സ്വന്തം ലേഖകന്‍

തിരുവനന്തപുരം: പി.എസ്.സിയുടെ പൊലിസ് കോണ്‍സ്റ്റബിള്‍ പരീക്ഷാ ക്രമക്കേടില്‍ കേസെടുത്തിട്ട് 12 ദിവസം കഴിഞ്ഞിട്ടും പ്രതികളെ പിടികൂടാനാകാതെ ക്രൈംബ്രാഞ്ച്.
പി.എസ്.സി ചോദ്യപേപ്പര്‍ ചോര്‍ത്തി മുന്‍ എസ്.എഫ്.ഐ നേതാക്കള്‍ക്ക് എസ്.എം.എസ് മുഖേന ഉത്തരമയച്ച പൊലിസുകാരന്‍ ഉള്‍പ്പെടെയുള്ള മുഖ്യപ്രതികളാണ് തെളിവുകളുമായി മുങ്ങിയിരിക്കുന്നത്. ഗൂഢാലോചന, വഞ്ചന തുടങ്ങിയ ജാമ്യം ലഭിക്കാവുന്ന കുറ്റങ്ങളാണ് പ്രതികള്‍ക്കെതിരേ ചുമത്തിയിരിക്കുന്നത്. യൂനിവേഴ്‌സിറ്റി കോളജില്‍നിന്ന് പൊലിസ് കോണ്‍സ്റ്റബിള്‍ പരീക്ഷയുടെ ചോദ്യപേപ്പര്‍ ചോര്‍ത്തിയാണ് പ്രതികള്‍ തട്ടിപ്പ് നടത്തിയതെന്നാണ് ക്രൈംബ്രാഞ്ചിന്റെ കണ്ടെത്തല്‍. ശിവരഞ്ജിത്ത്, പ്രണവ്, നസീം, സഫീര്‍, ഗോകുല്‍ എന്നിവരെ പ്രതിയാക്കി ഈ മാസം എട്ടിനാണ് ക്രൈംബ്രാഞ്ച് കേസെടുത്തത്. നിലവില്‍ ലഭിച്ചിട്ടുള്ള തെളിവുകള്‍ അനുസരിച്ച് ജാമ്യം ലഭിക്കാവുന്ന കുറ്റങ്ങളാണ് പ്രതികള്‍ക്കെതിരേയുള്ളത്.
ചോദ്യപേപ്പര്‍ ചോര്‍ത്തി എസ്.എം.എസ് വഴി ഉത്തരമയച്ച് പരീക്ഷ എഴുതിയെന്ന് തെളിഞ്ഞാല്‍ മാത്രമേ പ്രതികള്‍ക്കെതിരേ മറ്റ് വകുപ്പുകള്‍ ചുമത്താന്‍ കഴിയൂ. അതിന് മുഖ്യപ്രതികള്‍ പിടിയിലാകണം. റാങ്ക് പട്ടികയില്‍ ഇടംപിടിച്ചവര്‍ക്ക് എസ്.എം.എസ് വഴി ഉത്തരമയച്ച എസ്.എ.പി ക്യാംപിലെ ഗോകുലും സുഹൃത്ത് സഫീറും ഒളിവിലാണ്. മറ്റ് രണ്ട് പ്രതികള്‍ യൂനിവേഴ്‌സിറ്റി കോളജ് കത്തിക്കുത്ത് കേസില്‍ റിമാന്‍ഡിലാണ്. ഉത്തരമയക്കാനായി പ്രതികള്‍ ഉപയോഗിച്ച മൊബൈല്‍ ഫോണുകള്‍ കണ്ടെത്തുക ഏറെ നിര്‍ണായകമാണ്. ഈ ഫോണുകളില്‍ നിന്നാണ് ഫോറന്‍സിക് പരിശോധനയിലൂടെ പ്രധാന തെളിവുകള്‍ കണ്ടെത്തേണ്ടത്. അറസ്റ്റ് നീണ്ടുപോകുന്നതോടെ പ്രതികള്‍ തൊണ്ടിമുതലുകള്‍ നശിപ്പിക്കാനുള്ള സാധ്യതയുമുണ്ട്.
മൂന്നു പ്രതികളുടെ വീടുകളിലും ക്രൈംബ്രാഞ്ച് പരിശോധന നടത്തിയെങ്കിലും തൊണ്ടിമുതലുകളൊന്നും കണ്ടെത്തിയില്ല. പരീക്ഷാ ക്രമക്കേട് ആദ്യം കണ്ടെത്തിയത് പി.എസ്.സി വിജിലന്‍സാണ്.
രഹസ്യമായി വിവരം പൊലിസിന് കൈമാറി കേസെടുത്ത് പ്രതികളെ കൈയോടെ പിടികൂടുന്നതിനുപകരം വിവരം പുറത്തായതും പ്രതികള്‍ക്ക് രക്ഷപ്പെടാന്‍ അവസരമൊരുക്കി. പരീക്ഷാഹാളിനുള്ളില്‍ പ്രതികള്‍ മൊബൈലോ സ്മാര്‍ട് വാച്ചോ ഉപയോഗിച്ചുവെന്നാണ് ക്രൈംബ്രാഞ്ച് സംശയിക്കുന്നത്.
പരീക്ഷാ ചുമതലുണ്ടായിരുന്ന ജീവനക്കാരുടെ പങ്കും കണ്ടെത്തേണ്ടതുണ്ട്. അതേസമയം, ശിവരഞ്ജിത്തിനെയും നസീമിനെയും ചോദ്യംചെയ്യാന്‍ ക്രൈംബ്രാഞ്ചിന് കോടതി അനുമതി നല്‍കി. ശിവരഞ്ജിത്തും നസീമും ഇപ്പോള്‍ കത്തിക്കുത്ത് കേസില്‍ പൂജപ്പുര സെന്‍ട്രല്‍ ജയിലിലാണ്.