ഫറൂഖബാദ്: ബെഡ് ഇല്ലെന്ന് പറഞ്ഞ് ഡോക്ടര്‍മാരും ജീവനക്കാരും അവഗണിച്ച യുവതി ആശുപത്രി വരാന്തയില്‍ കുഞ്ഞിന് ജന്മംനല്‍കി. ഫറൂഖബാദ് ജില്ലയിലെ രാം മനോഹര്‍ ലോഹ്യ സര്‍ക്കാര്‍ ആശുപത്രിയിലാണ് സംഭവം.

ഒരാള്‍ മൊബൈലില്‍ പകര്‍ത്തി മാധ്യമപ്രവര്‍ത്തകര്‍ക്കു നല്‍കിയതോടെയാണ് സംഭവമറിഞ്ഞത്. വെറും വരാന്തയില്‍ ചുവന്ന തുണി വിരിച്ച് യുവതി കിടക്കുന്നതിന്റെ ദൃശ്യവും കുഞ്ഞിന് ജന്മം നല്‍കുന്നതും കൃത്യമായി കാണാം.

കുറച്ചു സമയത്തിനു ശേഷം, മറ്റൊരു സ്ത്രീ സഹായത്തിന് എത്തുകയും കുഞ്ഞിനെ കൂടുതല്‍ തുണി കൊണ്ട് മൂടിയെടുക്കുകയും ചെയ്യുന്നുണ്ട്. പ്രസവിച്ച ശേഷം യുവതിയെ ഡോക്ടര്‍മാര്‍ ലേബര്‍ റൂമിലേക്ക് കൊണ്ടുപോയെന്ന് പ്രാദേശിക ലേഖകര്‍ റിപ്പോര്‍ട്ട് ചെയ്തു.

സംഭവത്തില്‍ അന്വേഷണം പ്രഖ്യാപിച്ചുവെന്ന് ജില്ലാ മജിസ്‌ട്രേറ്റ് മണിക്കാ റാണി പറഞ്ഞു. അന്വേഷിച്ച് കര്‍ശന നടപടിയെടുക്കുമെന്ന് അവര്‍ പറഞ്ഞു.