കൊച്ചി: ശബരിമല കയറാനെത്തിയ നടിയും മോഡലുമായ രഹ്‌ന മനോജിന്റെ വീടിനുനേരെ ആക്രമണം.
എറണാകുളം പനമ്പള്ളി നഗറിലെ ബി.എസ്.എന്‍.എല്‍ ക്വാര്‍ട്ടേഴ്‌സില്‍ രഹ്‌ന താമസിക്കുന്ന വീടാണ് ആക്രമിക്കപ്പെട്ടത്. രഹ്‌ന ശബരിമലയിലേക്കെത്തുന്നു എന്ന് ഭര്‍ത്താവ് മനോജ് ശ്രീധര്‍ ഫേസ്ബുക്കില്‍ പോസ്റ്റ് ചെയ്തതിനു പിന്നാലെയായിരുന്നു ആക്രമണം.
വീടിന്റെ ചില്ലുകളും പുറത്തുണ്ടായിരുന്ന കസേരകളും വ്യായാമ ഉപകരണങ്ങളും നശിപ്പിച്ചിട്ടുണ്ട്. വീട് പൂട്ടിക്കിടന്നതിനാല്‍ കാര്യമായ നാശനഷ്ടങ്ങള്‍ ഉണ്ടായിട്ടില്ലെന്നാണ് വിലയിരുത്തല്‍.
രാവിലെ എട്ടുമണിയോടെ ഹെല്‍മറ്റ് ധരിച്ചെത്തിയ രണ്ടുപേര്‍ വീട് ആക്രമിച്ചതായി ബി.എസ്.എന്‍.എല്‍ ക്വാര്‍ട്ടേഴ്‌സ് അസോസിയേഷന്‍ സെക്രട്ടറി പറഞ്ഞു. സി.സി ടി.വി ദൃശ്യങ്ങള്‍ അടക്കം പരിശോധിച്ചുവരികയാണെന്ന് സൗത്ത് സി.ഐ സിബി ടോം പറഞ്ഞു.
സംഭവ സ്ഥലം കൊച്ചി റേഞ്ച് ഐ.ജി വിജയ് സാഖറേ, സിറ്റി പൊലിസ് കമ്മിഷനര്‍ എം.പി ദിനേശ്, ഡി.സി.പി ഹിമേന്ദ്രനാഥ്, തൃക്കാക്കര എ.സി.പി പി.പി ഷംസ്, സ്‌പെഷ്യല്‍ ബ്രാഞ്ച് എ.സി.പി ഉമേഷ്‌കുമാര്‍ എന്നിവര്‍ സന്ദര്‍ശിച്ചു. ബി.ജെ.പി, യുവമോര്‍ച്ച, മഹിളമോര്‍ച്ച, ഹിന്ദു ഐക്യവേദി പ്രവര്‍ത്തകരുടെ നേതൃത്വത്തില്‍ രഹ്‌നയുടെ വീട്ടിലേക്ക് മാര്‍ച്ച് നടത്തി. ഹിന്ദു ഐക്യവേദി സംസ്ഥാന കമ്മിറ്റി അംഗം എ.ബി ബിജു ഉദ്ഘാടനം ചെയ്തു.