ന്യൂയോര്‍ക്ക്: കഴിഞ്ഞമാസം ഇറാഖിലെ ഇറാന്റെ ആയുധകേന്ദ്രത്തില്‍ ബോംബിട്ടത് ഇസ്‌റാഈലെന്ന് യു.എസ്. ഇറാഖിലെ സൈനികകേന്ദ്രങ്ങളിലും ഇറാന്റെ പിന്തുണയുള്ള അര്‍ധസൈനികരുടെ ആയുധഡിപ്പോകളിലും ഈയിടെ നടന്ന വ്യോമാക്രമണത്തിനു പിന്നില്‍ ഇസ്‌റാഈലാണെന്ന് പ്രധാനമന്ത്രി നെതന്യാഹു അവകാശപ്പെട്ടിരുന്നു.
ഇസ്‌റാഈല്‍ തെരഞ്ഞെടുപ്പ് അടുത്ത മാസം നടക്കാനിരിക്കെ യു.എസ് വെളിപ്പെടുത്തല്‍ നെതന്യാഹുവിനു ഗുണം ചെയ്യുമെന്നാണ് വിലയിരുത്തല്‍.
ഇസ്‌റാഈലി ഡ്രോണുകളാണ് ആക്രമണം നടത്തിയതെന്ന് ഏതാനും ദിവസം മുമ്പ് ഇറാഖിലെ ശീഈ സൈനികസംഘ തലവന്‍ ആരോപിച്ചിരുന്നു. കഴിഞ്ഞ മാസങ്ങളില്‍ ഇറാഖിലെ ശീഈ സൈനികകേന്ദ്രങ്ങള്‍ക്കു നേരെ മൂന്ന് വ്യോമാക്രമണങ്ങള്‍ നടന്നിരുന്നു. ജൂലൈയില്‍ നടന്ന വ്യോമാക്രമണത്തില്‍ രണ്ട് ഇറാന്‍ സൈനിക കമാന്‍ഡര്‍മാര്‍ കൊല്ലപ്പെട്ടിരുന്നു. 1981ല്‍ സദ്ദാം ഹുസൈന്റെ ആണവനിലയത്തെ ഇസ്‌റാഈലി യുദ്ധവിമാനങ്ങള്‍ ബോംബിട്ട് നശിപ്പിച്ച ശേഷം ആദ്യമായാണ് ഇത്തരമൊരു ആക്രമണം.
അതേസമയം സിറിയ, ലബ്‌നാന്‍, യമന്‍, ഇറാഖ് എന്നീ രാജ്യങ്ങളില്‍ സൈനിക കേന്ദ്രങ്ങളുണ്ടാക്കാനാണ് ഇറാന്റെ ശ്രമമെന്നും ഇറാന് ഒരിടത്തും ഇസ്‌റാഈലിനെ ആക്രമിക്കാനുതകുന്ന കേന്ദ്രമുണ്ടാക്കാന്‍ അനുവദിക്കില്ലെന്നും നെതന്യാഹു റഷ്യന്‍ ടി.വിയുമായി നടത്തിയ അഭിമുഖത്തില്‍ പറഞ്ഞു.
ഇറാഖിലും സിറിയയിലും ഇറാനെതിരേ ആക്രമണം നടത്താന്‍ തങ്ങള്‍ക്ക് യു.എസിന്റെയും റഷ്യയുടെയും അനുമതിയുണ്ടെന്ന് കഴിഞ്ഞദിവസം ഇസ്‌റാഈല്‍ ഉദ്യോഗസ്ഥര്‍ വെളിപ്പെടുത്തിയിരുന്നു.