കൊല്ലം: ചവറയില്‍ ഹോട്ടല്‍ ജീവനക്കാരനെ ബൈക്കിലെത്തിയവര്‍ വെട്ടിപരുക്കേല്‍പ്പിച്ചു. പട്ടത്താനം അപ്പുപ്പേഴ്ത്ത് കോളനിയില്‍ സന്തോഷിനാ(33)ണ് വെട്ടേറ്റത്.

കഴിഞ്ഞ ദിവസം രാത്രി എട്ടിന് സൊസൈറ്റി മുക്കിന് പടിഞ്ഞാറ് കാട്ടില്‍ മുക്കിലായിരുന്നു സംഭവം. വാഴേമുക്കിലെ ഹോട്ടല്‍ ജീവനക്കാരനായ സന്തോഷ് വീട്ടില്‍ നിന്നും ഹോട്ടലിലേക്ക് പോകും വഴിയാണ് വെട്ടേറ്റത്.

ബൈക്കിലെത്തിയ രണ്ടു പേരാണ് തന്നെ വെട്ടിയെതെന്നും അവരെ അറിയില്ലന്നും സന്തോഷ് പറഞ്ഞു. ആളൊഴിഞ്ഞ സ്ഥലമായതിനാല്‍ ആരും സംഭവ സമയത്ത് സ്ഥലത്തില്ലായിരുന്നു. തലക്ക് വെട്ടേറ്റ സന്തോഷിനെ അതുവഴി വന്ന യാത്രക്കാരാണ് ആശുപത്രിയില്‍ എത്തിച്ചത്. സന്തോഷിന്റെ തലക്ക് സാരമായ പരുക്കേറ്റിട്ടുണ്ട്. ചവറ പൊലിസ് കേസെടുത്ത് അന്വേഷണം ആരംഭിച്ചു.