കൊച്ചി: എറണാകുളം അങ്കമാലി അതിരൂപതയുടെ ഭരണചുമതലയില്‍ നിന്ന് കര്‍ദിനാള്‍ മാര്‍ ജോര്‍ജ് ആലഞ്ചേരി ഒഴിഞ്ഞു. മാണ്ഡ്യ ബിഷപ്പായിരുന്ന മാര്‍ ആന്റണി കരിയിലാണ് പുതിയ ആര്‍ച്ച് ബിഷപ്പ്.

സീറോ മലബാര്‍ സഭയുടെ സിനഡിന്റെ സമാപന വേളയിലായിരുന്നു പ്രഖ്യാപനം. കര്‍ദിനാള്‍ മാര്‍ ആലഞ്ചേരി തന്നെയാണ് പുതിയ ആര്‍ച്ച് ബിഷപ്പിന്റെ പേര് ഔദ്യോഗികമായി പ്രഖ്യാപിച്ചത്.

ബിഷപ്പ് ആന്റണി കരിയില്‍ എറണാകുളം അങ്കമാലി അതിരൂപതയുടെ ചുമതലയിലേക്ക് നിയോഗിക്കപ്പെട്ടതോടെ മാണ്ഡ്യ രൂപതയുടെ പുതിയ ബിഷപ്പായി മാര്‍ സെബാസ്റ്റ്യന്‍ എടയന്ത്രത്തിനെയും നിയമിച്ചു.

ചേര്‍ത്തല ചാലില്‍ സ്വദേശിയായ മാര്‍ കരിയില്‍(69)സി.എം.ഐ സന്യാസസമൂഹത്തില്‍ നിന്നുള്ള ബിഷപ്പാണ്. കളമശേരി രാജഗിരി കോളജിന്റെ പ്രിന്‍സിപ്പലായിരുന്നു.

ജോസ് പുത്തന്‍വീട്ടിലിനെ ഫരീദാബാദ് രൂപതയുടെ സഹായ മെത്രാനായി നിയമിച്ചു. സിനഡിന്റെ തീരുമാനങ്ങള്‍ക്ക് വത്തിക്കാന്‍ അംഗീകാരം നല്‍കിയിട്ടുണ്ട്. അതിരൂപതയിലെ സാമ്പത്തിക കാര്യങ്ങളുടെ ചുമതല പുതിയ ബിഷപ്പിനായിരിക്കുമെന്ന് വത്തിക്കാന്‍ വ്യക്തമാക്കിയിട്ടുണ്ട്.