ന്യൂഡല്‍ഹി/ചേര്‍ത്തല: ജലന്ധര്‍ ബിഷപ്പ് ഫ്രാങ്കോ മുളയ്ക്കലിനെതിരേ മൊഴിനല്‍കിയ ഫാ. കുര്യാക്കോസ് കാട്ടുതറ ദുരൂഹസാഹചര്യത്തില്‍ മരിച്ച സംഭവത്തില്‍ അസ്വാഭാവിക മരണത്തിന് കേസെടുത്തു.
എഫ്.ഐ.ആറില്‍ ആരുടെയും പേര് രേഖപ്പെടുത്തിയിട്ടില്ല. മരണത്തില്‍ അസ്വാഭാവികതയുണ്ടെന്ന് ചൂണ്ടിക്കാട്ടി ഹോഷിയാര്‍പൂര്‍ പൊലിസില്‍ ബന്ധുക്കള്‍ പരാതി നല്‍കിയിരുന്നു. ഫാ. കുര്യാക്കോസിന്റെ സഹോദരന്‍ ഉള്‍പ്പടെയുള്ള ബന്ധുക്കളില്‍ നിന്ന് പൊലിസ് മൊഴിയെടുത്തിട്ടുണ്ട്. മൂന്നു ഡോക്ടര്‍മാര്‍ ഉള്‍പ്പെട്ട പ്രത്യേക മെഡിക്കല്‍ സംഘം ഇന്നലെ വൈകിട്ട് 6.30ഓടെയാണ് വൈദികന്റെ പോസ്റ്റ്‌മോര്‍ട്ടം നടപടികള്‍ പൂര്‍ത്തിയാക്കിയത്. മരണത്തില്‍ അസ്വാഭാവികതയുണ്ടോയെന്നത് പോസ്റ്റ്‌മോര്‍ട്ടം റിപ്പോര്‍ട്ടിന്റെ അടിസ്ഥാനത്തില്‍ പരിശോധിച്ചുവരികയാണെന്ന് ഡി.എസ്.പി എ.ആര്‍ ശര്‍മ പറഞ്ഞു. ആന്തരികമായോ ബാഹ്യമായോ പരുക്കുകളില്ലെന്നാണ് പോസ്റ്റ്‌മോര്‍ട്ടം റിപ്പോര്‍ട്ടിലെ പ്രാഥമിക സൂചനകള്‍. മരണവുമായി ബന്ധപ്പെട്ട് വിവാദം ഉടലെടുത്ത സാഹചര്യത്തില്‍ ആന്തരികാവയവങ്ങള്‍ വിശദമായ പരിശോധനക്ക് അയക്കും. മരണകാരണം അവയവങ്ങളുടെ പരിശോധനാ ഫലങ്ങള്‍ ലഭിച്ചശേഷം മാത്രമേ വ്യക്തമാകുകയുള്ളൂവെന്നും ഡോക്ടര്‍മാര്‍ പറഞ്ഞു. പത്തോളജി, ഹിസ്‌റ്റോളജി ഫലങ്ങള്‍ ലഭിക്കാന്‍ മാസങ്ങളെടുക്കും.
പഞ്ചാബിലെ ഹോഷിയാര്‍പൂരിലെ ദസുവയിലെ സെന്റ് പോള്‍സ് കോണ്‍വെന്റിനോട് ചേര്‍ന്ന താമസസ്ഥലത്ത് തിങ്കളാഴ്ചയാണ് ചേര്‍ത്തല പള്ളിപ്പുറം സ്വദേശിയായ ഫാ. കുര്യാക്കോസ് കാട്ടുതറയെ മരിച്ചനിലയില്‍ കണ്ടെത്തിയത്.
പോസ്റ്റ്‌മോര്‍ട്ടം കേരളത്തില്‍ നടത്തണമെന്ന ആവശ്യം ബന്ധുക്കള്‍ ഉന്നയിച്ചെങ്കിലും പൊലിസ് അനുവദിച്ചില്ല. കേരളത്തില്‍ വച്ച് റീ പോസ്റ്റ്‌മോര്‍ട്ടം നടത്തുമെന്ന് ബന്ധുക്കള്‍ വ്യക്തമാക്കിയിട്ടുണ്ട്. അതിനിടെ, ഫാ.കുര്യാക്കോസ് കാട്ടുതറയുടെ മൃതദേഹം ബുധനാഴ്ച നാട്ടിലെത്തിച്ച് 25ന് സംസ്‌കരിക്കും. ഉച്ചക്ക് രണ്ടിന് ഡല്‍ഹിയില്‍ നിന്ന് വിമാനമാര്‍ഗം കൊണ്ടുവരുന്ന മൃതദേഹം വൈകിട്ട് 5.30ന് നെടുമ്പാശ്ശേരിയിലെത്തും.
തുടര്‍ന്ന് പള്ളിപ്പുറം ശാന്തികവലയിലെ കുടുംബവീട്ടിലെത്തിക്കും. 25ന് ഉച്ചക്ക് രണ്ടിന് പള്ളിപ്പുറം സെന്റ് മേരീസ് ഫൊറോന പള്ളി സെമിത്തേരിയിലാണ് സംസ്‌കാരം. മരണത്തില്‍ ദുരൂഹതയുണ്ടെന്ന് ചൂണ്ടിക്കാട്ടി വൈദികന്റെ സഹോദരന്‍ ജോസ് ജില്ലാ പൊലിസ് മേധാവിക്ക് പരാതി നല്‍കി.