മലപ്പുറം: മമ്പുറം ഖുത്ബുസ്സമാന്‍ സയ്യിദ് അലവി മൗലദ്ദവീല തങ്ങളുടെ 181 ാം ആണ്ടുനേര്‍ച്ചയ്ക്ക് നാളെ തുടക്കമാകും. പരിപാടിയുടെ മുഴുവന്‍ ഒരുക്കങ്ങളും പൂര്‍ത്തിയായതായി ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. നാളെ വൈകിട്ട് നാലിനു മഖാമില്‍ കൂട്ടസിയാറത്ത് നടക്കും. കോഴിക്കോട് വലിയ ഖാസി പാണക്കാട് നാസര്‍ ഹയ്യ് ശിഹാബ് തങ്ങള്‍ നേതൃത്വം നല്‍കും. തുടര്‍ന്ന് മമ്പുറം അഹ്മദ് ജിഫ്‌രി തങ്ങള്‍ കൊടി ഉയര്‍ത്തും. വൈകിട്ട് ഏഴിനു നടക്കുന്ന മജ്‌ലിസുന്നൂര്‍ സംഗമത്തില്‍ സമസ്ത മുശാവറ അംഗം എ.മരക്കാര്‍ മുസ്‌ലിയാര്‍ പ്രാര്‍ഥന നടത്തും. അബ്ദുസ്സലാം ബാഖവി കിഴിശ്ശേരി സംസാരിക്കും.

2, 3, 4 തിയതികളില്‍ രാത്രി മൗലിദ് പാരായണവും ഉദ്‌ബോധന ക്ലാസുകളും നടക്കും. അഞ്ചിനു രാത്രി നടക്കുന്ന സ്വലാത്ത് മജ്‌ലിസിനു കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി നേതൃത്വം നല്‍കും. ആറിനു രാത്രി അനുസ്മരണ പ്രഭാഷണം അബ്ബാസലി ശിഹാബ് തങ്ങള്‍ ഉദ്ഘാടനം ചെയ്യും. അബ്ദുസ്സമദ് പൂക്കോട്ടൂര്‍ സംസാരിക്കും. ഏഴിനു രാത്രി പ്രാര്‍ഥനാ സമ്മേളനവും മമ്പുറം സയ്യിദ് മൗലദ്ദവീല ഹിഫ്‌ളുല്‍ ഖുര്‍ആന്‍ കോളജില്‍നിന്ന് ഖുര്‍ആന്‍ മനഃപാഠമാക്കിയ ഹാഫിളീങ്ങള്‍ക്കുള്ള സനദ് ദാനവും നടക്കും. സാദിഖലി ശിഹാബ് തങ്ങള്‍ ഉദ്ഘാടനം ചെയ്യും. പ്രാര്‍ഥനാ സദസിനു വാവാട് കുഞ്ഞിക്കോയ മുസ്‌ലിയാര്‍ നേതൃത്വം നല്‍കും. ദാറുല്‍ ഹുദാ വൈസ് ചാന്‍സലര്‍ ഡോ.ബഹാഉദ്ദീന്‍ മുഹമ്മദ് നദ്‌വി അധ്യക്ഷനാകും. സമസ്ത ജന.സെക്രട്ടറി പ്രൊഫ. കെ.ആലിക്കുട്ടി മുസ്‌ലിയാര്‍ സനദ്ദാനം നിര്‍വഹിക്കും.
സമാപന ദിനമായ എട്ടിനു രാവിലെ എട്ടു മുതല്‍ അന്നദാനം നടക്കും. പരിപാടി പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. അബ്ദുറഹ്മാന്‍ ജിഫ്‌രി തങ്ങള്‍ അധ്യക്ഷനാകും. ആബിദ് ഹുസൈന്‍ തങ്ങള്‍ എം.എല്‍.എ, അഹ്മദ് ജിഫ്‌രി തങ്ങള്‍ മമ്പുറം സംബന്ധിക്കും.

ഉച്ചയ്ക്ക് ഒന്നിനു നടക്കുന്ന മൗലിദ് ഖത്മുല്‍ ഖുര്‍ആന്‍ പ്രാര്‍ഥനയോടെ ആണ്ടുനേര്‍ച്ചയ്ക്ക് സമാപ്തിയാകും. സമാപന പ്രാര്‍ഥനയ്ക്ക് സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ നേതൃത്വം നല്‍കും. വാര്‍ത്താസമ്മേളനത്തില്‍ യു.ശാഫി ഹാജി ചെമ്മാട്, ഹംസ ഹാജി മൂന്നിയൂര്‍, സി.കെ മുഹമ്മദ് ഹാജി, കെ.പി ശംസുദ്ദീന്‍ ഹാജി പങ്കെടുത്തു.