പുല്‍പ്പള്ളി: കുടിയേറ്റ മേഖലയില്‍ രൂക്ഷമായിക്കൊണ്ടിരിക്കുന്ന കുടിവെള്ള ക്ഷാമത്തിനും വരള്‍ച്ചയ്ക്കും ശാശ്വത പരിഹാരം കാണുന്നതിന് കന്നാരംപുഴയില്‍ ചെറുകിട ജലസേചന പദ്ധതി ആരംഭിക്കണമെന്ന ആവശ്യം ശക്തമാകുന്നു.  
കന്നാരംപുഴയില്‍ കര്‍ഷകരെ കുടിയിറക്കാതെ തന്നെ ചെറുകിട ജലസേചന പദ്ധതി ആരംഭിക്കാന്‍ കഴിയും. പദ്ധതി നടപ്പിലായാല്‍ അമരക്കുനി, അമ്പത്താറ്, കാപ്പിസെറ്റ്, പാറക്കടവ്, വണ്ടിക്കടവ്, ശശിമല തുടങ്ങിയ പ്രദേശങ്ങളില്‍ ജലസേചനമെത്തിക്കാന്‍ കഴിയുന്നതോടെ ഈ മേഖലയിലുണ്ടായിക്കൊണ്ടിരിക്കുന്ന വരള്‍ച്ചയെ പ്രതിരോധിക്കുന്നതിനും കൃഷിയിറക്കാതെ കിടക്കുന്ന പാടങ്ങളില്‍ നെല്‍കൃഷി ഉള്‍പ്പെടെ ആരംഭിക്കുന്നതിനും കഴിയും. ഇത്തരത്തിലുള്ള പദ്ധതികള്‍ സര്‍ക്കാര്‍ തലത്തില്‍ നടപ്പിലാക്കാന്‍ ജലസേചന വകുപ്പ് തയാറാകണമെന്നാണ് കര്‍ഷകരുടെ ആവശ്യം.
മേഖലയില്‍ കാലവര്‍ഷം കാര്യമായി ലഭിക്കാത്തത് കാരണം കബനി നദിയില്‍ നിന്നും എത്തിക്കുന്ന വെള്ളമാണ് ഇപ്പോഴും പുല്‍പ്പള്ളി, മുള്ളന്‍കൊല്ലി മേഖലയിലെ ഭൂരിഭാഗം പ്രദേശങ്ങളിലും ഉപയോഗിക്കുന്നത്. കാലവര്‍ഷം കാര്യമായി ലഭിക്കാത്തത് കാരണം കിണറുകളിലും കുളങ്ങളിലും ജലനിരപ്പ് ഉയരാത്ത അവസ്ഥയാണുള്ളത്.മുദ്ദള്ളിതോട്, കടമാന്‍തോട്, കന്നാരംപുഴ എന്നിവിടങ്ങളില്‍ 63-ഓളം തടയണകള്‍ നിലവിലുണ്ടെങ്കിലും വെള്ളം സംഭരിക്കാന്‍ ആവശ്യമായ യാതൊരു നടപടിയുമുണ്ടായിട്ടില്ല. ഇതിന് ശാശ്വത പരിഹാരം കാണുന്നതിന് കന്നാരംപുഴയില്‍ ചെറുകിട ജലസേചന പദ്ധതി ആരംഭിച്ചാല്‍ പുല്‍പ്പള്ളി, മുള്ളന്‍കൊല്ലി പഞ്ചായത്തുകളിലെ ഭൂരിഭാഗം പ്രദേശങ്ങളിലും വരള്‍ച്ചയെ പ്രതിരോധിക്കാന്‍ കഴിയുമെന്നാണ് കര്‍ഷകര്‍ പറയുന്നത്.