ദീപു ശാന്താറാം
കോതമംഗലം: അരനൂറ്റാണ്ടിലേറെ റേഡിയോയേയും ബുള്‍ ബുള്‍ എന്ന വാദ്യോപകരണത്തേയും സ്വന്തം പ്രാണനെ പോലെ സ്‌നേഹിക്കുന്നു അലക്‌സാണ്ടര്‍ അധ്യാപകന്‍. ഒരു കാലഘട്ടത്തിന്റെ ശബ്ദമായിരുന്ന റേഡിയോയാണ് തന്റെ ജീവിതത്തെ മാറ്റിമറിച്ചതെന്ന് എറണാകുളം കോതമംഗലം മാലിപ്പാറ ചെങ്ങമനാട്ട് സി. കെ അലക്‌സാണ്ടര്‍ മാഷ് പറയുന്നു.
റേഡിയോ ആണ് തനിക്കു മികച്ച അധ്യാപകനുള്ള സംസ്ഥാന ദേശിയ അവാര്‍ഡുകള്‍ (1995, 1996)നേടിത്തന്നതില്‍ മുഖ്യ പങ്കു വഹിച്ചതെന്നും അലക്‌സാണ്ടര്‍ ഓര്‍ക്കുന്നു. 1980ല്‍ മികച്ച റേഡിയോ ശ്രോതാവായതിന് അന്നത്തെ കേന്ദ്ര മന്ത്രി വസന്ത സാട്ടെ സമ്മാനമായി റേഡിയോ നല്‍കി. ലാഭകരമായ കോഴി വളര്‍ത്തല്‍ കൃഷിപാഠ പരമ്പര അങ്ങനെ നിരവധി തവണ പുരസ്‌കാരങ്ങള്‍ നേടി.
ആകാശവാണിയിലൂടെ ഉള്ള കൃഷിപാഠം പരമ്പരകളായ ജീവധാര, അമൂല്യം ഈ നേത്രങ്ങള്‍, അക്ഷയ ഊര്‍ജവും നമ്മളും, നമ്മുടെ ആഹാരം, സുഗന്ധ കേരളം, എയ്ഡ്‌സ് ബോധവല്‍ക്കരണം തുടങ്ങി നിരവധി പരമ്പരകളില്‍ വിജയി.
ഇതുകൂടാതെ സമ്മാനമായി ലഭിച്ച രണ്ടു തവണത്തെ അഖിലേന്ത്യാ പര്യടനം. അങ്ങനെ നീളുന്നു വിജയപ്പട്ടിക. സമ്മാനമായി ലഭിച്ച 20 റേഡിയോകള്‍ ബന്ധുക്കള്‍ക്കും സുഹൃത്തുക്കള്‍ക്കും നല്‍കികൊണ്ട് അവരെയും റേഡിയോ കേള്‍പ്പിക്കുവാന്‍ പ്രേരിപ്പിക്കുന്ന വ്യക്തി.
1998ല്‍ കോതമംഗലം മാര്‍ ബേസില്‍ ഹയര്‍ സെക്കണ്ടറി സ്‌കൂളിലെ ചിത്രകലാ അധ്യാപനത്തില്‍നിന്ന് വിരമിച്ച അദ്ദേഹത്തിന്റെ ഇപ്പോഴെത്ത കൂട്ട് റേഡിയോയും ബുള്‍ ബുള്‍ എന്ന സംഗീത വാദ്യോപകരണവുമാണ് .പുതുതലമുറയ്ക്ക് അത്ര സുപരിചിതമല്ലാത്ത പഴയ കാല വാദ്യോപകരണമാണ് ബുള്‍ബുള്‍. കോതമംഗലം മാര്‍ അത്തനേഷ്യസ് കോളജിലെ ലാബ് അസിസ്റ്റന്റ് ആയ മകന്‍ ഏബിള്‍. സി. അലക്‌സിനോടൊപ്പമാണ് ഇപ്പോള്‍ അലക്‌സാണ്ടറുടെ താമസം.