ഒറ്റപ്പാലം: സോളാര്‍ പാനല്‍ സ്ഥാപിച്ചതിലൂടെ വൈദ്യുതി കെ.എസ്.ഇ.ബി.ക്ക് നല്‍കി വരുമാനമാര്‍ഗ്ഗമാക്കി ഈസ്റ്റ് ഒറ്റപ്പാലം മസ്ജിദ് കമ്മിറ്റി. ഈസ്റ്റ് ഒറ്റപ്പാലം സുബാത്തുല്‍ ഇസ്ലാം ജമാഅത്ത് കമ്മിറ്റി സോളാര്‍പാനല്‍ സ്ഥാപിച്ച് വൈദ്യുതി ഉല്‍പാദനം ആരംഭിച്ചതിലൂടെയാണ് നേട്ടം കൈവരിക്കാനായത്. എട്ടു ലക്ഷം രൂപയോളം ചെലവുവരുന്ന10 കെ.വിയുടെ സോളാര്‍പാനലാണ് മസ്ജിദ് കമ്മിറ്റി സ്ഥാപിച്ചിട്ടുള്ളത്. ഓരോ ദിവസവും 50 യൂനിറ്റിലധികം വൈദ്യുതി ഉല്‍പ്പാദനമാണ് കമ്മിറ്റി പ്രതീക്ഷിക്കുന്നത്.
മസ്ജിദിന് ആവശ്യമായ വൈദ്യുതി കെ.എസ്.ഇ.ബി നല്‍കുകയും, സോളാര്‍ പാനലിലൂടെ ഉല്പാദിപ്പിച്ച വൈദ്യുതി പ്രത്യേക സംവിധാനത്തിലൂടെ കെഎസ്ഇബിക്ക് നല്‍കുകയാണ് ചെയ്യുന്നത്. ഉല്പാദിപ്പിച്ച വൈദ്യുതി മസ്ജിദ് ഉപയോഗത്തേക്കാള്‍ കൂടുതലാണെങ്കില്‍ അധികം വരുന്ന വൈദ്യുതിക്ക് കെ.എസ്.ഇ.ബി കമ്മിറ്റിക്ക് വില നല്‍കണം എന്നതായിരുന്നു വ്യവസ്ഥ. സോളാര്‍ പാനല്‍ സ്ഥാപിക്കുന്നതിന് മുന്‍പ് 20,000 രൂപയോളം വൈദ്യുതിബില്‍ വന്നിരുന്നതായും ഇപ്പോള്‍മസ്ജിദ് ആവശ്യമായ വൈദ്യുതിയുടെ ഉപയോഗം കഴിഞ്ഞതിനുശേഷം മിച്ചംവരുന്ന വൈദ്യുതിയുടെ അളവ് പ്രകാരം കെ.എസ്.ഇ.ബി ഒക്ടോബര്‍ മാസത്തില്‍ 1226 രൂപ മസ്ജിദ് കമ്മിറ്റിക്കു നല്‍കിയതായും കമ്മിറ്റി ഭാരവാഹിയായ പി.എം.എ ജലീല്‍ പറഞ്ഞു.