ഹാംബര്‍ഗ്: ഹോളണ്ടില്‍ സ്വപ്നതുല്യമായ ഗോള്‍നേട്ടം സ്വന്തമാക്കി അരങ്ങേറ്റക്കാരന്‍ ഡോണയല്‍ മെലാന്‍. യൂറോകപ്പ് യോഗ്യതാ പട്ടികയിലെ സി ഗ്രൂപ്പില്‍ ജര്‍മനിയെ 4-2ന് പരാജയപ്പെടുത്തിയപ്പോള്‍ അവസാന രണ്ട് ഗോളില്‍ ഒന്ന് താരത്തിന്റെ വകയായിരുന്നു. പിറകില്‍ പോയതിന് ശേഷം തിരിച്ചുവന്നാണ് ഹോളണ്ട് മുന്‍ ലോക ചാംപ്യന്‍മാരെ കീഴടക്കിയത്.
ഒന്‍പതാം മിനുട്ടില്‍ ഒരു ഗോളിന് പിന്നില്‍ നിന്നശേഷം രണ്ടാംപകുതിയിലാണ് ഹോളണ്ടിന്റെ ഗോളുകളെല്ലാം പിറന്നത്. ജര്‍മനിയുടെ ഹോംഗ്രൗണ്ടിലായിരുന്നു മത്സരം. ഹോളണ്ടിനായി ഡി ജോങും വിജിനാള്‍ഡും മറ്റു ഗോളുകള്‍ നേടിയപ്പോള്‍ ഗ്നാബ്രിയുടെയും ടോണി ക്രൂസിന്റെയും വകയാണ് ജര്‍മനിയുടെ ഗോളുകള്‍.
മത്സരം തുടങ്ങി ഒന്‍പതാം മിനുട്ടില്‍ ഗ്‌നാബ്രിയിലൂടെയാണ് ജര്‍മനി മുന്നിലെത്തിയത്. പക്ഷേ, പന്തടക്കത്തില്‍ ജര്‍മനിയേക്കാള്‍ ഒരുപടി മുന്നില്‍നിന്ന ഹോളണ്ട് സമനില കണ്ടെത്താന്‍ വിഷമിച്ചു. രണ്ടാം പകുതിയില്‍ കളിയുടെ ഗതി തന്നെ മാറി. ശൈലിമാറ്റിക്കളിച്ച ഹോളണ്ട് ആക്രമണം ശക്തമാക്കി. ഉടന്‍ തന്നെ ഫലവും കണ്ടു. 59ാം മിനുട്ടില്‍ ബേബലിന്റെ പാസില്‍ ഡി ജോങ്ങിന്റെ തകര്‍പ്പനൊരു ഗോള്‍ നേട്ടം. പിന്നാലെ ഏഴ് മിനുട്ടുകള്‍ക്കകം ജര്‍മന്‍ പ്രതിരോധ താരം ജൊനാഥന്‍ താഹിയുടെ ഒരു സെല്‍ഫ് ഗോളിലൂടെ ഹോളണ്ട് ലീഡെടുത്തു. അതോടെ ആതിഥേയരുടെ പ്രതീക്ഷയ്ക്ക് മങ്ങലേറ്റു. പക്ഷേ പൊരുതിയ ജര്‍മനിക്ക് അനൂകൂലമായി 73ാം മിനുട്ടില്‍ പെനാല്‍റ്റി ലഭിച്ചു. ഷോട്ടെടുത്ത ടോണി ക്രൂസ് ലക്ഷ്യത്തിലെത്തിച്ച് മത്സരം 2- 2 എന്ന നിലയിലാക്കി. പിന്നീട് ലീഡിനായി കിണഞ്ഞു ശ്രമിച്ചപ്പോള്‍ 79ാം മിനുട്ടില്‍ അരങ്ങേറ്റക്കാരന്‍ മെലാനിലൂടെ ഡച്ച് പട മുന്നിലെത്തി. അവസാന മിനുട്ടില്‍ വിജിനാള്‍ഡും കൂടി ഗോളടിച്ചതോടെ 4-2ന്റെ ജയം ഹോളണ്ടിനൊപ്പം നിന്നു.