ന്യൂഡല്‍ഹി: ചന്ദ്രയാന്‍ 2 ദൗത്യത്തില്‍ ഇന്നല്ലെങ്കില്‍ നാളെ നാം ലക്ഷ്യം കാണുമെന്ന് കോണ്‍ഗ്രസ് അധ്യക്ഷ സോണിയാഗാന്ധി. തടസങ്ങള്‍ വിജയത്തിന്റെ ചവിട്ടുപടിയാണ്. അതു താണ്ടാതെ വിജയത്തിലെത്താന്‍ കഴിയില്ല. രണ്ടാം ചന്ദ്രയാന്‍ ദൗത്യം വിജയത്തിന്റെ അടിത്തറ ഉറപ്പാക്കിയിട്ടുണ്ട്. ഐ.എസ്.ആര്‍.ഒ ബുദ്ധിമാര്‍മാരായ ശാസ്ത്രജ്ഞരുടെ കേന്ദ്രമാണ്. അവര്‍ ആത്മാര്‍ത്ഥതയോടെ കഠിനാധ്വാനം ചെയ്താണ് ദൗത്യം നടപ്പാക്കുന്നതെന്നും സോണിയാ ഗാന്ധി പറഞ്ഞു.
ഐ.എസ്.ആര്‍.ഒ ശാസ്ത്രജ്ഞരുടെ നിശ്ചയദാര്‍ഢ്യവും കഠിനാധ്വാനവും ഓരോ പൗരനും മാതൃകാപരമാണെന്ന രാഹുല്‍ ഗാന്ധി പറഞ്ഞു. നിങ്ങളുടെ പ്രവര്‍ത്തനങ്ങള്‍ പാഴാവില്ല. ഇത് പുതിയ ദൗത്യത്തിന് അടിത്തറയാകുമെന്നും രാഹുല്‍ പറഞ്ഞു. ഐ.എസ്.ആര്‍.ഒയെക്കുറിച്ചോര്‍ത്ത് അഭിമാനിക്കാമെന്ന് പ്രിയങ്കാ ഗാന്ധി പറഞ്ഞു. തിരിച്ചടികള്‍ മുന്നോട്ടുള്ള പോക്കിന്റെ ഭാഗമാണ്. അതില്ലാതെ വിജയത്തിലെത്താന്‍ കഴിയില്ല. രാജ്യമൊന്നടങ്കം നിങ്ങള്‍ക്കൊപ്പം നില്‍ക്കുവെന്നും പ്രിയങ്ക പറഞ്ഞു.