തിരുവനന്തപുരം: കഴിഞ്ഞ മൂന്നരപതിറ്റാണ്ടായി ഓണക്കാലത്ത് സംസ്ഥാനത്തെ എല്ലാ കാര്‍ഡുടമകള്‍ക്കും ലഭിച്ചുകൊണ്ടിരുന്ന റേഷന്‍ പഞ്ചസാര ഈ വര്‍ഷം നല്‍കേണ്ടെന്ന് തിരുമാനിച്ച സര്‍ക്കാരിന്റെ നടപടി കടുത്ത ജനവഞ്ചനയാണെന്ന് പ്രതിപക്ഷ നേതാവ് രമേശ് ചെന്നിത്തല.
ഈ ഓണക്കാലത്ത് അവശ്യ സാധനങ്ങള്‍ റേഷന്‍ കടകളില്‍ ഉണ്ടെന്ന് ഉറപ്പ് വരുത്തുന്നതില്‍ സര്‍ക്കാര്‍ പരാജയപ്പെട്ടു. മാവേലിസ്റ്റോറുകളില്‍ നിന്ന് ഒന്നും ഈ ഓണക്കാലത്ത് ലഭിക്കാത്ത അവസ്ഥയാണ്. ഡല്‍ഹിയില്‍ ഉള്‍പ്പെടെ അനാവശ്യ നിയമനങ്ങള്‍ സൃഷ്ടിച്ചും അവയ്‌ക്കെല്ലാം കോടികള്‍ വാരിയൊഴുക്കിയും ധൂര്‍ത്ത് തുടരുകയാണ് സര്‍ക്കാര്‍. എന്നാല്‍ പാവപ്പെട്ടവര്‍ക്ക് ഓണത്തിന് അരിയും പഞ്ചസാരയും നല്‍കാന്‍ കൈയില്‍ പണമില്ലെന്നാണ് സര്‍ക്കാര്‍ പറയുന്നത്.
പ്രളയ ബാധിത പ്രദേശങ്ങളില്‍ സൗജന്യ റേഷന്‍ നല്‍കാന്‍ സര്‍ക്കാര്‍ ഉത്തരവ് മാത്രമിറക്കി. അതിനുള്ള അരി എത്തിക്കാന്‍ തയാറായില്ല. തങ്ങള്‍ പണം കൊടുത്തുവാങ്ങിയ അരി സൗജന്യമായി നല്‍കാന്‍ റേഷന്‍കട ഉടമകള്‍ തയാറാകുന്നുമില്ല. അതുകൊണ്ട് പ്രളയ ബാധിത പ്രദേശങ്ങളിലേതടക്കമുള്ള സൗജന്യ റേഷന്‍ വിതരണം മുടങ്ങിയിരിക്കുകയാണ്. സര്‍ക്കാരിന്റെ കെടുകാര്യസ്ഥതയും അനാസ്ഥയും മൂലം കേരളത്തിലെ ലക്ഷോപലക്ഷം സാധാരണക്കാരുടെ ഓണം വെള്ളത്തിലായിരിക്കുകയാണെന്നും പ്രതിപക്ഷ നേതാവ് കുറ്റപ്പെടുത്തി.