തിരുവനന്തപുരം: പിറന്നാള്‍ ദിനത്തില്‍ ജാവ്‌ലിന്‍ ത്രോയില്‍ സ്വര്‍ണമെറിഞ്ഞിട്ട് മേളയുടെ താരമായിരിക്കുകയാണ് എറണാകുളത്തിന്റെ ജിബിന്‍ തോമസ്. ജൂനിയര്‍ ആണ്‍കുട്ടികളുടെ ജാവ്‌ലിന്‍ ത്രോയില്‍ സ്വര്‍ണം നേടിയ ജിബിന്‍ തോമസ് 57.34 മീറ്ററാണ് ജാവ്‌ലിന്‍ പായിച്ചത്. കോതമംഗലം മതിരപ്പള്ളി എം.എ കോളജ് സ്‌പോര്‍ട്‌സ് ഹോസ്റ്റലിന്റെ താരമായ ജിബിന്‍ മതിരപ്പള്ളി ജി.വി.എച്.എസ്.എസിലെ പ്ലസ് വണ്‍ വിദ്യാര്‍ഥിയാണ്.
ജിബിന്റെ മീറ്റ് ബെസ്റ്റ് 60 മീറ്ററാണ്. മേളക്കെത്തുമ്പോള്‍ റെക്കോര്‍ഡും മെഡലും പ്രതീക്ഷിച്ചിരുന്നെന്നും മെഡല്‍ നേടിയതില്‍ സന്തോഷമുണ്ടെന്നും പ്രതീക്ഷക്കൊത്ത് ഉയരാനാവാത്തതില്‍ സങ്കടമുണ്ടെന്നും ജിബിന്‍ പറഞ്ഞു. നിലവിലെ മീറ്റ് റെക്കോര്‍ഡ് 2017ല്‍ മാര്‍ബേസിലിന്റെ യാദവ് നരേഷ് കൃപാല്‍ സ്ഥാപിച്ച 61.66 മീറ്റര്‍ ആണ്. കഴിഞ്ഞ സൗത്ത് സോണ്‍ ദേശീയ മീറ്റില്‍ സ്വര്‍ണവും കഴിഞ്ഞ സംസ്ഥാന കായികമേളയിലും കഴിഞ്ഞ സൗത്ത് സോണ്‍ മീറ്റിലും രണ്ടാംസ്ഥാനവും നേടിയ ജിബിന്‍ ദേശീയ മീറ്റിലും സുവര്‍ണനേട്ടം ആവര്‍ത്തിക്കാനുള്ള ഒരുക്കത്തിലാണ്. പിതാവ് തോമസ്‌കുട്ടി, മാതാവ് മിനി, സഹോദരന്‍ ഫെബിന്‍ തോമസ് എന്നിവരും ജിബിന് പൂര്‍ണ പിന്തുണ നല്‍കുന്നുണ്ട്. പത്തനംതിട്ട കിസിമം ഗവ.എച്.എസ്.എസിലെ വിജയ് ബിനോയ് രണ്ടാം സ്ഥാനവും കോതമംഗലം സെന്റ്‌ജോര്‍ജ്‌സ് എച്ച്.എസ്.എസിലെ അമല്‍ ബേബി മൂന്നാം സ്ഥാനവും നേടി.