അരീക്കോട്: പുണ്യമാസത്തില്‍ നോമ്പ് നോറ്റ് വ്യത്യസ്തയാവുകയാണ് ഊര്‍ങ്ങാട്ടിരി പഞ്ചായത്ത് വൈസ് പ്രസിഡന്റ് ഷിജി പുന്നക്കല്‍. സഹപ്രവര്‍ത്തകരും പഞ്ചായത്ത് ജീവനക്കാരുമായ മുസ്‌ലിം സുഹൃത്തുക്കളോടുള്ള ഐക്യദാര്‍ഢ്യമായാണ് ഷിജി നോമ്പെടുത്ത് തുടങ്ങിയത്.
അയല്‍വാസികളില്‍ കൂടുതലും മുസ്‌ലിംകളാണ്. ഇവര്‍ നോമ്പെടുക്കുന്നത് കണ്ട് ശീലിച്ചതാണ് നോമ്പ് നോല്‍ക്കാന്‍ പ്രേരകമായതെന്ന് ഷിജി പറയുന്നു. കഴിഞ്ഞ വര്‍ഷവും നോമ്പെടുത്തിരുന്നെങ്കിലും മൂന്ന് ദിവസം മാത്രമാണ് പൂര്‍ത്തീകരിക്കാനായത്. ഇക്കുറി നോമ്പിനായി നേത്തെ തന്നെ മാനസികമായി തയാറെടുത്തതായി ഷിജി പറഞ്ഞു.
പുലര്‍ച്ചെ മൂന്നിന് മുന്‍പെ എണീറ്റ് അത്താഴത്തിനുള്ള വിഭവങ്ങള്‍ ഒരുക്കും. പഞ്ചായത്തോഫിസിലെ തിരക്കുകള്‍ ഒഴിഞ്ഞ നേരത്ത് വീട്ടിലെത്തിയാണ് നോമ്പുതുറക്കുള്ള വിഭവങ്ങള്‍ തയാറാക്കുക.
തുടക്കത്തില്‍ ചെറിയ പ്രയാസം തോന്നിയെങ്കിലും നോമ്പ് ഇപ്പോള്‍ തന്റെ ജീവിതത്തിന്റെ ഭാഗമായി കഴിഞ്ഞുവെന്ന് ഇവര്‍ പറയുന്നു. വെറ്റിലപ്പാറ സ്വദേശിയായ മനോജിന്റെ ഭാര്യയാണ് ഷിജി പുന്നക്കല്‍. സി.പി.ഐയുടെ പ്രതിനിധിയായി വിളക്കുപറമ്പ് വാര്‍ഡില്‍ നിന്നാണ് ഷിജി വിജയിച്ചത്.