കോഴിക്കോട്: കേരളത്തിന്റെ നൂതന വികസന മാതൃകയായ കുടുംബശ്രീ നിര്‍മാണരംഗത്തും സജീവമാകുന്നു. സ്ത്രീകള്‍ക്ക് അപരിചിതമായ നിര്‍മാണമേഖലയില്‍ സാങ്കേതിക പരിജ്ഞാനം നല്‍കി സുസ്ഥിരമായ നിര്‍മാണ സംരംഭങ്ങള്‍ സ്ഥാപിച്ച് 'പിങ്ക് ലാഡര്‍' പദ്ധതിയിലൂടെയാണു കുടുംബശ്രീയുടെ പുത്തന്‍ ചുവടുവപ്പിനൊരുങ്ങുന്നത്. സര്‍ക്കാരിന്റെ വിവിധ ഭവനപദ്ധതികള്‍ നടപ്പാക്കുമ്പോള്‍ ആശ്രയമില്ലാത്തവരും നിസഹായരുമായ കുടുംബങ്ങളുടെ വീട് ചുരുങ്ങിയ ചെലവില്‍ നിര്‍മിക്കുന്നതിനാവശ്യമായ നിര്‍മാണരീതി അനുവര്‍ത്തിക്കുന്നതിനാണു പദ്ധതിയിലൂടെ ലക്ഷ്യമിടുന്നത്.
മലബാറില്‍ അര്‍ബര്‍ മേഖലയിലെ ആദ്യ സംരംഭമാണിത്. കൊല്ലം, തിരുവല്ല, എറണാകുളം എന്നിവിടങ്ങളില്‍ കുടുംബശ്രീയുടെ നിര്‍മാണ യൂനിറ്റുകള്‍ സജീവമാണ്. 15 പേരടങ്ങുന്ന രണ്ടു യൂനിറ്റുകള്‍ തറനിര്‍മാണം മുതല്‍ ഫിനിഷിങ് ജോലികള്‍ വരെ ചെയ്യും. നിര്‍മാണ പരിശീലനത്തിനുള്ള സാമ്പത്തികസഹായം ജില്ലാ കുടുംബശ്രീ മിഷനും സാങ്കേതിക സഹായം ഏക് സാത്തും നല്‍കും. 10 ലക്ഷം രൂപയുടെ പ്രവൃത്തി പൂര്‍ത്തിയാക്കിയാല്‍ സര്‍ക്കാര്‍ അംഗീകൃത ഏജന്‍സി പദവിയും പിങ്ക് ലാഡറിനു ലഭിക്കും.
പി.എം.എ.വൈ ലൈഫ് ഗുണഭോക്താക്കളായ കോര്‍പറേഷനിലെ 50-ാം വാര്‍ഡിലെ ശോഭനയുടെയും ഏഴാം വാര്‍ഡിലെ നന്ദിനിയുടെയും ഭവനനിര്‍മാണമാണ് ആദ്യഘട്ടത്തില്‍ ഏറ്റെടുത്തത്. ബേപ്പൂര്‍ തമ്പി റോഡ് ഇടക്കിട്ട കോവിലകംപറമ്പില്‍ നടന്ന ചടങ്ങില്‍ മേയര്‍ തറക്കല്ലിടല്‍ നിര്‍വഹിച്ചു.