കോഴിക്കോട്: മദ്റസാ പ്രസ്ഥാനത്തിന്റെ ആവശ്യകത ബോധ്യപ്പെടുത്തുന്നതിനും മുഅല്ലിം സമൂഹത്തെയും മാനേജ്മെന്റ് ഭാരവാഹികളെയും ആദരിക്കുന്നതിനുമായി സമസ്ത കേരള ജംഇയ്യത്തുല്‍ മുഅല്ലിമീന്‍ സെന്‍ട്രല്‍ കൗണ്‍സില്‍ സംഘടിപ്പിക്കുന്ന മുഅല്ലിം ഡേ നാളെ.

സമസ്ത കേരള ഇസ്ലാം മത വിദ്യാഭ്യാസ ബോര്‍ഡിന് കീഴില്‍ പ്രവര്‍ത്തിക്കുന്ന പതിനൊന്നായിരത്തിലധികം മദ്റസകളില്‍ മുഅല്ലിം ഡേയുടെ ഭാഗമായി വിവിധ പരിപാടികള്‍ സംഘടിപ്പിക്കും. കാംപയിന്റെ ഭാഗമായി ജില്ലാ, റെയ്ഞ്ച്, മദ്റസാ തലങ്ങളില്‍ മതപഠന ക്ലാസുകള്‍, മഖ്ബറ സിയാറത്ത്, അനുസ്മരണ പ്രാര്‍ഥനാ സംഗമം, മഹല്ല്-മദ്റസാ സാരഥികളെ ആദരിക്കല്‍, ഖുര്‍ആന്‍ പാരായണം, ദിക്ര്‍-ദുആ മജ്ലിസ്, മജ്ലിസുന്നൂര്‍, ആത്മീയ സദസ്സുകള്‍ എന്നിവ നടക്കും.

മതാധ്യാപനത്തിന് ശക്തിപകരുന്ന മുഅല്ലിമീങ്ങള്‍ക്ക് അധ്യാപനരീതികളില്‍ പരിശീലനം നല്‍കുന്നതോടൊപ്പം വീട് നിര്‍മാണം, പെണ്‍മക്കളുടെ വിവാഹം, ചികിത്സ, പ്രസവസഹായം, മരണാനന്തര ക്രിയാസഹായം, വിധവാ സംരക്ഷണം, അവശസഹായം, സര്‍വീസ് ആനുകൂല്യങ്ങള്‍, പെന്‍ഷന്‍, തവാറുസ്, മുഅല്ലിം മന്‍സില്‍, മുഅല്ലിം നികാഹ്, മദ്റസാ ഗ്രാന്റുകള്‍, വിവിധ അവാര്‍ഡുകള്‍, കലാ-സാഹിത്യ മത്സരങ്ങള്‍, പ്രസിദ്ധീകരണങ്ങള്‍ തുടങ്ങി ഒട്ടേറെ പദ്ധതികളാണ് ജംഇയ്യത്തുല്‍ മുഅല്ലിമീന്‍ ഇതിനകം വിജയകരമായി നടപ്പാക്കിവരുന്നത്. വിവിധ വെല്ലുവിളികള്‍ നേരിടുന്ന മദ്റസാ പ്രസ്ഥാനത്തെ കൂടുതല്‍ ശക്തിപ്പെടുത്തുന്നതിനും നിലനിര്‍ത്തുന്നതിനുമായി ജംഇയ്യത്തുല്‍ മുഅല്ലിമീന്‍ സജീവമായ ഇടപെടലുകള്‍ നടത്തിവരികയാണ്.

മതാധ്യാപകര്‍ക്കായുള്ള ക്ഷേമപദ്ധതികള്‍ക്ക് ശക്തിപകരുന്നതിനായി കോടിക്കണക്കിന് രൂപയാണ് സമസ്ത കേരള ജംഇയ്യത്തുല്‍ മുഅല്ലിമീന്‍ സെന്‍ട്രല്‍ കൗണ്‍സില്‍ ഓരോ വര്‍ഷവും ചെലവഴിച്ചുവരുന്നത്. ജൂണ്‍ 9-ന് ആരംഭിച്ച കാംപയിന്‍ ഈ മാസം 25-ന് സമാപിക്കും. ജംഇയ്യത്തുല്‍ മുഅല്ലിമീന്‍ സെന്‍ട്രല്‍ കൗണ്‍സിലിന് കീഴിലുള്ള 576 റെയ്ഞ്ചുകളും 22 ജില്ലാ ഘടകങ്ങളും കാംപയിന്റെ ഭാഗമാകും.