ന്യൂഡല്‍ഹി: സുപ്രിംകോടതി ചീഫ് ജസ്റ്റിസ് രഞ്ജന്‍ ഗൊഗോയിക്കെതിരേ ലൈംഗിക പീഡനാരോപണമുന്നയിച്ച സുപ്രിം കോടതി മുന്‍ ജീവനക്കാരിക്കെതിരായ തട്ടിപ്പ് കേസ് ഡല്‍ഹി പൊലിസ് അവസാനിപ്പിച്ചു.
കേസ് അവസാനിപ്പിക്കണമെന്ന ഡല്‍ഹി പൊലിസ് ക്രൈബ്രാഞ്ചിന്റെ അപേക്ഷ ചീഫ് മെട്രോപൊളിറ്റന്‍ മജിസ്‌ട്രേറ്റ് മനീഷ് കുഹാരണ അംഗീകരിച്ചു. ചീഫ് ജസ്റ്റിസിന് വഴങ്ങാത്തതിനാല്‍ തന്നെ കള്ളക്കേസില്‍ക്കുടുക്കി പീഡിപ്പിക്കുകയാണെന്ന് യുവതി ആരോപിച്ചിരുന്നു.
ഹരിയാന സ്വദേശിയായ നവീന്‍ കുമാറെന്ന വ്യക്തിയില്‍ നിന്ന് ജോലി വാഗ്ദാനം ചെയ്ത് 50,000 രൂപ തട്ടിയെന്നായിരുന്നു കേസ്. കഴിഞ്ഞയാഴ്ചയാണ് ഡല്‍ഹി പൊലിസ് കേസ് അവസാനിപ്പിക്കുകയാണെന്ന് കോടതിയില്‍ റിപ്പോര്‍ട്ട് നല്‍കിയത്.
കോടതിയില്‍ നേരിട്ട് ഹാജരാകാന്‍ ഈ ഘട്ടത്തില്‍ നവീന്‍ കുമാറിനോട് കോടതി ആവശ്യപ്പെട്ടിരുന്നു. അതിന്റെ അടിസ്ഥാനത്തില്‍ പരാതിക്കാരന്‍ നേരിട്ട് ഹാജരായി. കേസ് അവസാനിപ്പിക്കുന്നതില്‍ എതിര്‍പ്പില്ലെന്ന് കോടതിയെ അറിയിക്കുകയായിരുന്നു.