ന്യൂഡല്‍ഹി: ഉത്തര്‍പ്രദേശിലെ ഉന്നാവോയില്‍ മുന്‍ ബി.ജെ.പി എം.എല്‍.എ കുല്‍ദീപ് സീങ് സെന്‍ഗര്‍ ബലാത്സംഗം ചെയ്തുവെന്ന് പരാതി ഉന്നയിച്ച പെണ്‍കുട്ടിയുടെ ജീവന് കടുത്ത ഭീഷണിയെന്ന് സി.ബി.ഐ. ഇന്നലെ കോടതിയില്‍ സമര്‍പ്പിച്ച കുറ്റപത്രത്തിലാണ് സി.ബി.ഐ ഇക്കാര്യം അറിയിച്ചത്.
ഇതേതുടര്‍ന്ന് പെണ്‍കുട്ടിയെയും കുടുംബത്തെയും സുരക്ഷിതമായി സംസ്ഥാനത്തോ അല്ലെങ്കില്‍ അയല്‍ സംസ്ഥാനങ്ങളിലോ താമസിപ്പിക്കുന്നത് സംബന്ധിച്ച് ഒരാഴ്ചക്കകം റിപ്പോര്‍ട്ട് നല്‍കാന്‍ യു.പി സര്‍ക്കാരിനോട് കോടതി ആവശ്യപ്പെട്ടു.
പെണ്‍കുട്ടിയും ബന്ധുക്കളും കാറില്‍ സഞ്ചരിക്കവെ ഇവരുടെ വാഹനത്തില്‍ ട്രക്കിടിച്ച് കൊലപ്പെടുത്താനും ശ്രമമുണ്ടായി. കഴിഞ്ഞ ജൂലൈ 28ന് നടന്ന അപകടത്തില്‍ ഗുരുതരമായി പരുക്കേറ്റ പെണ്‍കുട്ടി ഇപ്പോഴും ആശുപത്രിയില്‍ ചികിത്സയിലാണ്. അപകടത്തിന് പിന്നിലും ബി.ജെ.പി എം.എല്‍.എയുടെ പങ്ക് വെളിപ്പെട്ടിട്ടുണ്ട്. പെണ്‍കുട്ടിയെ പീഡിപ്പിച്ച കേസില്‍ സെന്‍ഗര്‍ ജയിലിലാണ്. ഇവിടെ നിന്നാണ് അദ്ദേഹം പെണ്‍കുട്ടിയെ കൊലപ്പെടുത്താനുള്ള നീക്കം നടത്തിയത്.
ഈ മാസം ആദ്യം പെണ്‍കുട്ടിയെ ആശുപത്രിയില്‍ സന്ദര്‍ശിച്ച് ഡല്‍ഹി പ്രത്യേക കോടതി ജഡ്ജ് ധര്‍മേഷ് ശര്‍മ മൊഴി രേഖപ്പെടുത്തിയിരുന്നു. കുല്‍ദീപില്‍ നിന്ന് ഭീഷണി നേരിടുന്നുവെന്ന് കാണിച്ച് പെണ്‍കുട്ടിയുടെ കുടുംബം നേരത്തെ സുപ്രിം കോടതിയില്‍ ഹരജി നല്‍കിയിരുന്നു. നാല് തവണ എം.എല്‍.എയായി തെരഞ്ഞെടുക്കപ്പെട്ട കുല്‍ദീപ് സെന്‍ഗാര്‍ 2017ലാണ് പെണ്‍കുട്ടിയെ പീഡിപ്പിച്ചത്. തുടര്‍ന്ന് കഴിഞ്ഞ വര്‍ഷം ഏപ്രില്‍ മുതല്‍ ജയിലില്‍ കഴിയുന്ന ഇയാള്‍ പെണ്‍കുട്ടിയെ വാഹനാപകടത്തില്‍ കൊലപ്പെടുത്താന്‍ ശ്രമിച്ചു. അപകടത്തിന് പിന്നില്‍ സെന്‍ഗാറാണെന്ന് പെണ്‍കുട്ടിയുടെ ബന്ധുക്കള്‍ പൊലിസിലും കോടതിയിലും വ്യക്തമാക്കിയിരുന്നു.