ചാത്തന്നൂര്‍: യുവതിയുടെ ഫോണിലേക്ക് മെസേജ് അയച്ച് ശല്യം ചെയ്‌തെന്നാരോപിച്ച് ഓട്ടോ ഡ്രൈവറെ മര്‍ദിച്ചു കൊന്നു. കൊട്ടിയം നടുവിലക്കര ദിലീപ് ഭവനില്‍ ദിലീപ് (42) ആണ് മരിച്ചത്. ഞായറാഴ്ച്ച ഉച്ചയോടെയാണ് സംഭവം.

സംഭവത്തില്‍ കല്ലുവാതുക്കല്‍ വിലവൂര്‍കോണം സ്വദേശി വരുണിനെയും (30) ഇയാളുടെ ഭാര്യയെയും പൊലിസ് കസ്റ്റഡിയില്‍ എടുത്തു. മര്‍ദ്ദന ശേഷം പാരിപ്പള്ളി മെഡിക്കല്‍ കോളജ് ആശുപത്രിയില്‍ അവശനിലയില്‍ എത്തിച്ച ദിലീപിന്റെ ശരീരത്തില്‍ മര്‍ദനമേറ്റ പാടുകള്‍ കണ്ട ആശുപത്രി അധികൃതരാണ് പൊലിസില്‍ വിവരമറിയിച്ചത്. പരിശോധനക്കിടെ ദിലീപ് മരിച്ചു. ദിലീപിനെ ആശുപത്രിയില്‍ എത്തിച്ച യുവാവിനെയും, ഒപ്പമുണ്ടായിരുന്ന സ്ത്രീയെയും പൊലിസ് കസ്റ്റഡിയില്‍ എടുക്കുകയും ചെയ്തു. 

ALSO READ: നെതന്യാഹു കൊല്ലപ്പെട്ടോ? അഭ്യുഹങ്ങള്‍ക്കിടെ പുതിയ വീഡിയോയില്‍ പ്രത്യക്ഷപ്പെട്ട് ഇസറാഈല്‍ പ്രധാനമന്ത്രി  

തന്റെ ഭാര്യയെ  ദിലീപ് നിരന്തരം ഫോണില്‍ വിളിച്ച് ശല്യം ചെയ്തിരുന്നതായി യുവാവ് മൊഴി നല്‍കി. ഇതുസംബന്ധിച്ചുണ്ടായ തര്‍ക്കം പരിഹരിക്കാന്‍ ഉളിയനാടുള്ള കൂട്ടുകാരന്റെ വാടക വീട്ടിലേക്ക് ദിലീപിനെ വിളിച്ചുവരുത്തുകയും സംഘം ചേര്‍ന്ന് ആക്രമിക്കുകയും ചെയ്‌തെന്നാണ് പൊലിസ് കണ്ടെത്തല്‍. മര്‍ദനത്തിനിടെ അവശനായ ദിലീപിനെ പ്രതികള്‍ മെഡിക്കല്‍ കോളജ് ആശുപത്രിയില്‍ എത്തിക്കുകയായിരുന്നു. കേസില്‍ കൂടുതല്‍ പേരെ പിടികൂടാനുണ്ടെന്നും അന്വേഷണം ഊര്‍ജിതമാക്കിയതായും പൊലിസ് പറഞ്ഞു. 

an auto driver was beaten to death for allegedly harassing a young woman by sending messages to her phone. dileep (42) died at dileep bhavan in naduvilakkara, kottayam.