ഭുവനേശ്വർ: ഒഡീഷയിൽ ചുഴലിക്കാറ്റിൽ രണ്ട് മരണം. മയൂർഭഞ്ച് ജില്ലയിലാണ് ചുഴലിക്കാറ്റ് വീശിയടിച്ചത്. ചുഴലിക്കാറ്റിൽ 10 പേർക്ക് പരുക്ക് പറ്റുകയും നൂറിലധികം വീടുകൾ തകരുകയും ചെയ്തുവെന്നാണ് റിപ്പോർട്ട്. നിരവധി വീടുകളുടെ മേൽക്കൂരകൾ പറന്നു പോവുകയും ചെയ്തു. ചുഴലിക്കാറ്റിൽ വലിയ മരങ്ങളും വൈദ്യത തൂണുകളും വീണു. പല സ്ഥലങ്ങളിലും വൈദ്യുതി വിതരണം തടസ്സപ്പെട്ടു. കരൻജിയയിലെ കിയ ഗ്രാമത്തിലാണ് ഏറ്റവുമധികം നാശ നഷ്ടമുണ്ടായത്. 

ചുഴലിക്കാറ്റിൽ റോഡുകളിലൂടെ പോയിരുന്ന വാഹനങ്ങളെയും ബാധിച്ചുവെന്നാണ് ലഭിക്കുന്ന വിവരം. കാറ്റിന്റെ ശക്തിയിൽ ഒരു ഓട്ടോറിക്ഷ റോഡിൽ നിന്നും തെന്നിമാറി സമീപത്തുള്ള കുളത്തിലേക്ക് വീണുവെന്നും റിപ്പോർട്ടുകളുണ്ട്. മരണപ്പെട്ടവരുടെ കുടുംബങ്ങൾക്ക് നാല് ലക്ഷം രൂപ ധന സഹായം സർക്കാർ പ്രഖ്യാപിച്ചു.