കല്‍പ്പറ്റ: നഗരത്തിലെ മെട്രോമാര്‍ട്ട് എന്ന സ്ഥാപനത്തില്‍ നിന്നു പണം കവര്‍ന്ന യുവാവിനെ കല്‍പ്പറ്റ പൊലിസ് അറസ്റ്റ് ചെയ്തു.
പെരുവണ്ണാമൂഴി ചങ്ങരോത്ത് രാഹുല്‍രാജ് (19) ആണ് പിടിയിലായത്. നാല് മോഷണക്കേസുകളിലെ പ്രതിയായ രാഹുല്‍രാജ് രണ്ട് മാസം മുന്‍പ് ജയില്‍ ശിക്ഷ കഴിഞ്ഞിറങ്ങിയതാണെന്ന് പൊലിസ് പറഞ്ഞു. കോടതയില്‍ ഹാജരാക്കിയ പ്രതിയെ റിമാന്റ് ചെയ്തു. കഴിഞ്ഞ 10നാണ് പകല്‍സമയം കടയില്‍ ആളില്ലാത്ത നേരത്ത് മോഷണം നടന്നത്.
മോഷ്ടാവിന്റെ അവ്യക്തമായ ദൃശ്യങ്ങള്‍ സി.സി.ടി.വിയില്‍ പതിഞ്ഞിരുന്നു. മേശയില്‍ നിന്ന് ഒരു ലക്ഷം രൂപയെടുത്ത് പോക്കറ്റില്‍ നിക്ഷേപിക്കുന്നതും വീഡിയോയില്‍ വ്യക്തമാണ്. എന്നാല്‍ മോഷ്ടാവിന്റെ മുഖം അവ്യക്തമായിരുന്നു. തുടര്‍ന്ന് ഈ ദൃശ്യങ്ങള്‍ സോഷ്യല്‍ മീഡിയവഴി പ്രചരിക്കുകയും ചെയ്തിരുന്നു.
തുടര്‍ന്ന് നടത്തിയ അന്വേഷണത്തില്‍ പെരുവണ്ണാമൂഴിയില്‍ നിന്ന് പ്രതിയെ പിടികൂടുകയായിരുന്നു. എന്നാല്‍ പ്രതിയില്‍ നിന്നു ആയിരം രൂപ മാത്രമേ പൊലിസിന് കണ്ടെത്താന്‍ കഴിഞ്ഞുള്ളൂ. അവശേഷിക്കുന്നപണം എങ്ങനെ ചിലവഴിച്ചുവെന്നത് തുടര്‍ അന്വേഷണത്തില്‍ മാത്രമേ കണ്ടെത്താനാകുവെന്ന് കല്‍പ്പറ്റ എസ്.ഐ ജയപ്രകാശ് പറഞ്ഞു.