കാഞ്ഞങ്ങാട്: ജില്ലാ ആശുപത്രിയില്‍ ആധുനിക സജ്ജീകരണങ്ങളടങ്ങിയ എ.സി.ആര്‍ ലാബ് റവന്യുമന്ത്രി ഇ. ചന്ദ്രശേഖരന്‍ നാടിന് സമര്‍പ്പിച്ചു. സ്വകാര്യലാബുകള്‍ ടെസ്റ്റുകള്‍ക്കും മറ്റുമായി വന്‍തുക ഈടാക്കുന്ന സാഹചര്യത്തില്‍ നിര്‍ധനരായ ജനങ്ങള്‍ക്ക് എ.സി.ആര്‍ ലാബിന്റെ പ്രവര്‍ത്തനം ഏറെ ഉപകാരപ്രദമാകുമെന്ന് മന്ത്രി പറഞ്ഞു. കാത്ത് ലാബ് പദ്ധതി തുടങ്ങുന്നതിനാവശ്യമായ നടപടികള്‍ ഉടന്‍ സ്വീകരിക്കുമെന്നും അദ്ദേഹം പറഞ്ഞു. ജില്ലാ ആശുപത്രിയില്‍ അനുവദിച്ചിട്ടുള്ള കാത്ത് ലാബിന് സ്ഥലമില്ലെന്ന് ഉന്നതോദ്യോഗസ്ഥര്‍ റിപോര്‍ട്ട് സമര്‍പ്പിച്ചതിനാല്‍ ജില്ലയ്ക്ക് നഷ്ടപ്പെടുന്ന സ്ഥിതിവിശേഷമുണ്ടായിരുന്നു. എന്നാല്‍ ആരോഗ്യവകുപ്പുമായി വ്യക്തിപരമായി തന്നെ ഇടപെട്ടു കൊണ്ടിരിക്കുന്നതിനാല്‍ സമീപഭാവിയില്‍ തന്നെ ജില്ലാ ആശുപത്രിയില്‍ കാത്ത് ലാബ് പ്രതീക്ഷിക്കാമെന്ന് അദ്ദേഹം വ്യക്തമാക്കി.
ട്രാവന്‍കൂര്‍ കൊച്ചിന്‍ ലിറ്റററി ആന്‍ഡ് സയന്റിഫിക് ചാരിറ്റബിള്‍ സൊസൈറ്റി ആക്ട് പ്രകാരം സ്ഥാപിതമായതും സംസ്ഥാന ആരോഗ്യമന്ത്രി ചെയര്‍പേഴ്‌സണുമായ കെ.എച്ച്.ആര്‍.ഡബ്ല്യു.എസിന്റെ പതിനൊന്നാമത് എ.സി.ആര്‍ ലാബാണിത്. ആര്‍.എസ്.ബി.വൈ, ചിസ്സ്, ജെ.എസ്.എസ്, കാരുണ്യ, എ.കെ തുടങ്ങിയ സര്‍ക്കാര്‍ സഹായ പദ്ധതികള്‍ ഈ ലാബിലെ പരിശോധനകള്‍ക്ക് ബാധകമാണ്.
കെ.എച്ച്.ഡബ്ല്യു.ആര്‍.എസ് മാനേജിങ് ഡയറക്ടര്‍ ജി. അശോക് ലാല്‍ റിപോര്‍ട്ട് അവതരിപ്പിച്ചു.
മുനിസിപ്പല്‍ കൗണ്‍സിലര്‍ വിജയ്മുകുന്ദ്, അഡ്വ. കെ. രാജ്‌മോഹനന്‍, അഡ്വ. ഗോവിന്ദന്‍ പള്ളിക്കാപ്പില്‍, എം. കുഞ്ഞികൃഷ്ണന്‍, കെ. മുഹമ്മദ്കുഞ്ഞി, സി.വി ദാമോദരന്‍, കൈപ്രത്ത് കൃഷ്ണന്‍ നമ്പ്യാര്‍, ജ്യോതിബസു, വേലായുധന്‍ കൊടവലം, ഡി.എം.ഒ എ.പി ദിനേശ്കുമാര്‍,സൂപ്രണ്ട് സ്റ്റാന്‍ലി സംസാരിച്ചു.