ജിദ്ദ: പരിശുദ്ധ ഹജ്ജ് ദിവസങ്ങളില്‍ പുണ്യസ്ഥലങ്ങളില്‍ തങ്ങള്‍ക്ക് സേവനങ്ങള്‍ നല്‍കാന്‍ ഇഷ്ടമുള്ള ത്വവാഫ കമ്പനികള്‍ തെരഞ്ഞെടുക്കുന്നതിന് വിദേശ ഹജ്ജ് തീര്‍ഥാടകര്‍ക്ക് അവസരം വരുമെന്ന് ഹജ്ജ്, ഉംറ മന്ത്രാലയം വ്യക്തമാക്കി.
മൂന്നു വര്‍ഷത്തിനു ശേഷം ഈ സൗകര്യം നിലവില്‍ വരുമെന്ന് ഹജ്ജ്, ഉംറ മന്ത്രാലയത്തിലെ ആസൂത്രണകാര്യ വിഭാഗം സൂപ്പര്‍വൈസര്‍ ജനറല്‍ ഡോ. അംറ് അല്‍മദ്ദാഹ് പറഞ്ഞു.
വിദേശ രാജ്യങ്ങളില്‍നിന്ന് എത്തുന്ന ഹജ്ജ് തീര്‍ഥാടകര്‍ക്ക് സേവനങ്ങള്‍ നല്‍കുന്നതിന്റെ ചുമതലയുള്ള ത്വവാഫ എസ്റ്റാബ്ലിഷ്‌മെന്റുകളെ വര്‍ഷം മുഴുവന്‍ പ്രവര്‍ത്തിക്കുന്ന കമ്പനികളാക്കി മാറ്റാന്‍ ഹജ്ജ്, ഉംറ മന്ത്രാലയത്തിന് നീക്കമുണ്ട്. വിമാന കമ്പനികള്‍ക്ക് ഭക്ഷണ വിതരണം ചെയ്യുന്നതു പോലെ മറ്റു സേവനങ്ങള്‍ നല്‍കുന്ന മേഖലകളില്‍ പ്രവര്‍ത്തിക്കുന്നതിനും ത്വവാഫ കമ്പനികളെ അനുവദിക്കും.