തിരൂരങ്ങാടി: ദേശീയപാത എ.ആര്‍ നഗര്‍ കൊളപ്പുറത്ത് വാഹനപരിശോധനയ്ക്കിടെ പൊലിസും നാട്ടുകാരും തമ്മിലുണ്ടായ സംഘര്‍ഷത്തിന്റെ പേരില്‍ യുവാക്കള്‍ക്കെതിരേ അനാവശ്യമായി കേസെടുത്ത പൊലിസ് നടപടിക്കെതിരേ പ്രതിഷേധം ശക്തം.
കേസില്‍ പൊലിസ് മുഖ്യ പ്രതികളാക്കിയിരിക്കുന്ന ബൈക്ക് ഉടമ കൊടുവായൂര്‍ പാട്ടശ്ശേരി ഫസല്‍ , പിതാവ് അബൂബക്കര്‍ കൂടാതെ കണ്ടാലറിയാവുന്ന മറ്റ് എട്ടുപേര്‍ക്കെതിരേയുമാണ് കേസെടുത്തിട്ടുള്ളത്. പൊലിസിന്റെ കൊള്ളരുതായ്മക്കെതിരേ പ്രതികരിക്കുന്നവരെ വിവിധ വകുപ്പുകളില്‍ പ്രതിചേര്‍ത്ത് പൊലിസുകാരെ രക്ഷപ്പെടുത്താനുള്ള നീക്കം അണിയറയില്‍ നടക്കുന്നതായി നാട്ടുകാര്‍ ആരോപിക്കുന്നു.
അതേസമയം പ്രതിപട്ടികയില്‍ ചേര്‍ത്തവരെ തേടി പൊലിസ് വീടുകളില്‍ കയറി കുടുംബങ്ങളെ ശല്യപ്പെടുത്തുന്നതായും പരാതിയുണ്ട്. പൊലിസിന്റെ ഇത്തരം നടപടികള്‍ക്കെതിരേ ശക്തമായ സമര പരിപാടികള്‍ക്കൊരുങ്ങുകയാണ് നാട്ടുകാര്‍. ബുധനാഴ്ച വൈകിട്ട് നടന്ന സംഭവത്തില്‍ ജില്ലാ പൊലിസ് സൂപ്രണ്ട് അന്വേഷണം പ്രഖ്യാപിച്ചിരുന്നു. സ്‌പെഷല്‍ ബ്രാഞ്ച് ഡി.വൈ.എസ്.പി വി.എ ഉല്ലാസിനാണ് അന്വേഷണ ചുമതല.