കുറ്റിപ്പുറം: സീബ്ര ക്രോസിങ് ലൈനുകള്‍ മായുന്നതിനാല്‍ റോഡുകള്‍ മുറിച്ചു കടക്കാന്‍ കാല്‍നടയാത്രക്കാര്‍ പ്രയാസപ്പെടുന്നു. ദേശീയപാതകളടക്കം സംസ്ഥാനത്തെ പ്രധാന റോഡുകളില്‍ സീബ്രാലൈന്‍ മാഞ്ഞതോടെ റോഡ് കുറുകെ കടക്കാനാകാതെ കാല്‍നടക്കാര്‍ വലയുകയാണ്. പലയിടത്തും ജീവന്‍ പണയംവെച്ചാണ് കാല്‍നടക്കാര്‍ റോഡ് കുറുകെ കടക്കുന്നത്. മാസങ്ങള്‍ക്ക് മുന്‍പ് അടയാളപ്പെടുത്തിയ സീബ്രാലൈനുകളാണ് പൂര്‍ണമായും മാഞ്ഞുപോകുന്നത്്. പൊലിസിന്റെ സേവനം ലഭ്യമാകാത്ത പലയിടങ്ങളിലും റോഡ് കുറുകെ കടക്കാന്‍ ഏറെ നേരം കാത്തുനില്‍ക്കേണ്ട അവസ്ഥയാണ്.
നഗരത്തിലെയും മറ്റ് പ്രധാന ജങ്ഷനുകളിലും സ്‌കൂളിന് സമീപത്തുമെല്ലാം സീബ്രാലൈന്‍ അടയാളപ്പെടുത്തിയിരുന്നു. ഇവയും മാഞ്ഞുപോയ അവസ്ഥയാണ്. ലൈന്‍ ഇല്ലാത്തതിനാല്‍ വാഹനങ്ങള്‍ നിര്‍ത്തിക്കൊടുക്കാനും ഡ്രൈവര്‍മാര്‍ തയാറാകുന്നില്ല. തെര്‍മോ പ്ലാസ്റ്റിക് പെയിന്റ് കൊണ്ടാണ് ലൈനുകള്‍ വരയ്ക്കുന്നത്. ഒരു സ്ഥലത്ത് സീബ്രാലൈന്‍ വരയ്ക്കുന്നതിന് 30,000 രൂപയ്ക്ക് മുകളിലാണു ചെലവ്. ഇത്രയും തുക മുടക്കിയിട്ട് അതിന്റെ ഫലം ലഭിക്കുന്നില്ല. അതേസമയം മാഞ്ഞുപോയ സീബ്രാലൈന്‍ അടയാളപ്പെടുത്താന്‍ തയാറാകാത്തതിനാല്‍ അധികൃതര്‍ക്കെതിരേ പ്രതിഷേധം ഉയരുകയാണ്.