തൊടുപുഴ: ജില്ലാ ലീഗല്‍ മെട്രോളജി സീനിയര്‍ ഇന്‍സ്‌പെക്ടര്‍ മൂവാറ്റുപുഴ ആയവന ഏനാനല്ലൂര്‍ കളമ്പൂര്‍ പി.കെ മോഹനന്‍ (55), അസി. ഇന്‍സ്‌പെക്ടര്‍ തൊടുപുഴ വെങ്ങല്ലൂര്‍ ചാമപ്പാറയില്‍ മാത്യൂസ് പുന്നന്‍ (42) എന്നിവരെ കൈക്കൂലി കേസില്‍ വിജിലന്‍സ് അറസ്റ്റ് ചെയ്തു. ഇരുവരില്‍നിന്ന് 9,600 രൂപയും പിടിച്ചെടുത്തു.
തൊടുപുഴ മിനി സിവില്‍ സ്റ്റേഷനില്‍നിന്ന് ഇന്നലെ രാത്രി ഏഴരയോടെയാണ് ഇവരെ തൊടുപുഴ വിജിലന്‍സ് ഡിവൈ.എസ്.പി കെ മഹേഷ്‌കുമാറിന്റെ നേതൃത്വത്തിലുള്ള സംഘം അറസ്റ്റ് ചെയ്തത്. വ്യാപാര സ്ഥാപനങ്ങളിലെ അളവ് തൂക്ക ഉപകരണങ്ങളുടെ മുദ്ര വയ്പിനാണ് ഇരുവരും കൈക്കൂലി വാങ്ങിയിരുന്നത്. ഒരു സ്ഥാപനത്തിന് 150 രൂപ എന്ന തോതില്‍ ഇരുവരും അനധികൃതമായി ഈടാക്കിയിരുന്നു. ഇത്തരത്തില്‍ ഒരുദിവസം പതിനായിരത്തോളം രൂപ പിരിച്ചെടുക്കുന്നതായി ലഭിച്ച പരാതിയുടെ അടിസ്ഥാനത്തില്‍ വിജിലന്‍സ് ഇവരെ നിരീക്ഷിച്ച്‌വരികയായിരുന്നു. ഇന്നലെ 64 ത്രാസുകള്‍ സര്‍വിസ് ചെയ്ത് മുദ്ര പതിക്കുന്നതിന് മോഹനന്‍ 6,400 രൂപയും മാത്യു 3,200 രൂപയുമാണ് കൈക്കൂലി ആവശ്യപ്പെട്ടത്. തുടര്‍ന്ന് റിപ്പയര്‍ സിജു വിജിലന്‍സിനെ വിവരമറിയിക്കുകയായിരുന്നു. പ്രതികളെ ഇന്ന് കോടതിയില്‍ ഹാജരാക്കും.