മൂന്നാര്‍: മൂന്നാര്‍ മേഖലയിലെ എസ്റ്റേറ്റ് ലയങ്ങളില്‍ കടുവ ഭീതി വിതയ്ക്കുന്നത് പതിവായതോടെ ഇവയെ നിരീക്ഷിക്കുന്നതിനായി വനപാലകര്‍ കാമറ സ്ഥാപിച്ചു. മൂന്നാറിലെ പെരിയവര എസ്റ്റേറ്റിലെ ആനമുടി ഡിവിഷനിലാണ് കടുവകളുടെ സാന്നിധ്യമുണ്ടായത്. എസ്റ്റേറ്റ് വീടുകള്‍ക്കരികിലുള്ള ഫീല്‍ഡ് നമ്പര്‍ 17 ലാണ് കാമറ സ്ഥാപിച്ചിരിക്കുന്നത്. 

കടുവയുടെ കാല്‍പാടുകള്‍ കണ്ട സ്ഥലത്തും കന്നുകാലികളെ ആക്രമിച്ച സ്ഥലത്തുമാണ് കാമറ സ്ഥാപിച്ചത്. കഴിഞ്ഞ 10 ദിവസത്തിനിടയില്‍ 11 പശുക്കളെയാണ് ഇവിടെ കടുവ ആക്രമിച്ച് കൊന്നത്. ഒരു പശുവിന് പരുക്കേല്‍ക്കുകയും ചെയ്തിരുന്നു. കടുവയുടെ ആക്രമണം രൂക്ഷമായതോടെ എസ്‌റ്റേറ്റ് വാസികള്‍ വനം വകുപ്പിന് പരാതി നല്‍കിയിരുന്നു. തങ്ങള്‍ക്കും കന്നുകാലികള്‍ക്കും സുരക്ഷയൊരുക്കണമെന്നാണ് ആവശ്യപ്പെട്ടിരുന്നത്. അതിന്റെ അതിസ്ഥാനത്തിലാണ് നാലിടങ്ങളില്‍ കാമറ സ്ഥാപിച്ചിരിക്കുന്നത്. വൈല്‍ഡ് ലൈഫ് എക്കോളജിസ്റ്റ് ഹാരിസ്, ഫോറസ്റ്റ് ഉദ്യോഗസ്ഥരായ രമേശ്, രാജ, ആനന്ദ് എന്നിവരുടെ നേതൃത്വത്തിലാണ് നടപടി സ്വീകരിച്ചത്.