ലഖ്‌നൗ: ലൈംഗികപീഡനക്കേസില്‍ അറസ്റ്റിലായ മുതിര്‍ന്ന ബി.ജെ.പി നേതാവും മുന്‍ കേന്ദ്രമന്ത്രിയുമായ സ്വാമി ചിന്മയാനന്ദിന്റെയും പരാതിക്കാരിയായ നിയമ വിദ്യാര്‍ഥിനിയുടെയും ജാമ്യാപേക്ഷ തള്ളി.

പെണ്‍കുട്ടിയുടെ പരാതിയില്‍ അറസ്റ്റിലായെങ്കിലും നിലവില്‍ ആശുപത്രിയില്‍ കഴിയുന്ന ചിന്മയാനന്ദ് സമര്‍പ്പിച്ച ജാമ്യാപേക്ഷ ഷാജഹാന്‍പൂര്‍ ജില്ലാ കോടതിയാണ് തള്ളിയത്. ചിന്മയാനന്ദില്‍നിന്ന് പണം തട്ടാന്‍ ശ്രമിച്ചെന്ന കേസിലാണ് വിദ്യാര്‍ഥിനി അറസ്റ്റിലായത്. പെണ്‍കുട്ടിയുടെ പീഡനപരാതിയില്‍ പോലിസ് ചിന്മയാനന്ദിനെ അറസ്റ്റ് ചെയ്‌തെങ്കിലും ബലാത്സംഗക്കുറ്റത്തിന് പകരം, ലൈംഗികവേഴ്ചയ്ക്കായി അധികാരദുര്‍വിനിയോഗം നടത്തിയെന്ന കുറ്റമാണ് പൊലിസ് ചുമത്തിയിരുന്നത്. അറസ്റ്റിലായതിന് പിന്നാലെ ആരോഗ്യപ്രശ്‌നങ്ങള്‍ ചൂണ്ടിക്കാണിച്ച് അദ്ദേഹത്തെ ആശുപത്രിയിലേക്ക് മാറ്റുകയായിരുന്നു. എന്നാല്‍, അനാരോഗ്യം അലട്ടുന്ന പെണ്‍കുട്ടി ചികിത്സപോലുമില്ലാതെയാണ് ജയിലില്‍ കഴിയുന്നതെന്ന് അവരുടെ പിതാവ് കഴിഞ്ഞദിവസം ആരോപിച്ചിരുന്നു.