കൊല്‍ക്കത്ത: അസമില്‍ കൊണ്ടുവന്ന പൗരത്വ രജിസ്റ്റര്‍ പശ്ചിമബംഗാളിലും കൊണ്ടുവരുമെന്നും നുഴഞ്ഞുകയറ്റക്കാരെ തെരഞ്ഞെുപിടിച്ചു പുറത്താക്കുമെന്നും കേന്ദ്ര ആഭ്യന്തര മന്ത്രി അമിത് ഷാ. കൊല്‍ക്കത്തയില്‍ സംഘടിപ്പിച്ച ബി.ജെ.പി റാലിയിലാണ് ഷായുടെ പ്രഖ്യാപനം. മുഖ്യമന്ത്രി മമത ബാനര്‍ജി പറയുന്നത് വിശ്വസിക്കരുതെന്ന് അമിത് ഷാ പറഞ്ഞു. 'കിംവദന്തികളാണ് മമത ബാനര്‍ജി പറയുന്നത്. പൗരത്വ പട്ടികയിലൂടെ ഹിന്ദു അഭയാര്‍ഥികളെ പശ്ചിമ ബംഗാളില്‍ നിന്ന് പുറത്താക്കുമെന്ന് പറഞ്ഞ് മമത ബാനര്‍ജി ജനങ്ങളെ ഭയപ്പെടുത്തുകയാണ്. എന്നാല്‍, അഭയാര്‍ഥികളായ ഹിന്ദു സഹോദരങ്ങള്‍ക്ക് രാജ്യത്തുനിന്ന് പുറത്തുപോകേണ്ടി വരില്ല. കേന്ദ്ര സര്‍ക്കാര്‍ അവരെയൊന്നും രാജ്യത്തുനിന്ന് പുറത്താക്കാന്‍ നടപടി സ്വീകരിക്കില്ല- അമിത് ഷാ പറഞ്ഞു.

പ്രതിപക്ഷത്തായിരുന്നപ്പോള്‍ നുഴഞ്ഞുകയറ്റക്കാരെയെല്ലാം രാജ്യത്തുനിന്ന് പുറത്താക്കണമെന്ന നിലപാടായിരുന്നു മമതയ്ക്ക്. ഇപ്പോള്‍ ആ നുഴഞ്ഞുകയറ്റക്കാരെല്ലാം മമതയ്ക്ക് വോട്ട് ബാങ്കായി. അതുകൊണ്ട് അവരെയൊന്നും രാജ്യത്തുനിന്ന് പുറത്താക്കരുതെന്ന നിലപാടാണ് മമത ബാനര്‍ജിയ്ക്കുള്ളത്. ദേശീയ താല്‍പര്യങ്ങള്‍ക്കു മുകളില്‍ നില്‍ക്കുന്നതാകരുത് രാഷ്ട്രീയ താല്‍പര്യങ്ങള്‍- അമിത് ഷാ പറഞ്ഞു.

അനധികൃത കുടിയേറ്റക്കാരില്‍ ആരെയും രാജ്യത്തു തങ്ങാന്‍ അനുവദിക്കില്ല. ഇന്ത്യയില്‍ അതിഥികളായെത്തിയ മുസ്‌ലിം ഇതര വിഭാഗങ്ങള്‍ക്കായുള്ള പൗരത്വ നിയമഭേദഗതി ഉടന്‍ കൊണ്ടുവരും. ഹിന്ദുവായ ഒരു അഭയാര്‍ഥിയും പുറത്തുപോകേണ്ടിവരില്ലെന്നും നുഴഞ്ഞുകയറ്റക്കാര്‍ക്ക് ഒരാള്‍ക്കു പോലും ഇവിടെ തുടരാനാകില്ലെന്നും അമിത് ഷാ വ്യക്തമാക്കി. ബംഗാളില്‍ നടക്കാന്‍ പോകുന്ന നിയമസഭാ തെരഞ്ഞെടുപ്പില്‍ ബി.ജെ.പിക്കു സര്‍ക്കാരുണ്ടാക്കാനാകുമെന്നും അമിത് ഷാ പറഞ്ഞു.

അസം പൗരത്വ രജിസ്റ്ററിനെ നിശിതമായി വിമര്‍ശിച്ചിരുന്ന തൃണമൂല്‍ കോണ്‍ഗ്രസ് നേതാവ് മമതാ ബാനര്‍ജി, ബംഗാളില്‍ അതു നടപ്പാക്കാന്‍ സമ്മതിക്കില്ലെന്നു നേരത്തെ വ്യക്തമാക്കുകയും ചെയ്തിരുന്നു. ഇതിനോടുള്ള പ്രതികരണമായായിരുന്നു അമിത് ഷായുടെ പരാമര്‍ശങ്ങള്‍.

Amit Shah: Will implement Citizenship (Amendment) Bill before NRC in Bengal