ആലക്കോട്: ചപ്പാരപ്പടവ് പ്രാഥമിക ആരോഗ്യ കേന്ദ്രത്തിന്റെ ചുറ്റുമതില്‍ അപകട ഭീഷണിയുയര്‍ത്തുന്നു. കഴിഞ്ഞദിവസം പെയ്ത മഴയില്‍ മതിലിന്റെ ഒരുഭാഗം തകര്‍ന്നു. പത്തു വര്‍ഷം മുന്‍പ് നിര്‍മിച്ച മതിലിന്റെ പല ഭാഗങ്ങളിലും വിള്ളലുകള്‍ വീണ അവസ്ഥയാണ്.
സിമന്റ് കുറച്ചാണ് മതില്‍ പണിതതെന്ന ആരോപണം നിര്‍മാണഘട്ടത്തിലുയര്‍ന്നിരുന്നു. പത്തടിയിലധികം ഉയരത്തില്‍ മതില്‍ നിര്‍മിക്കുമ്പോള്‍ പാലിക്കേണ്ട സുരക്ഷാ സംവിധാനമൊന്നും ഇവിടെ ഒരുക്കിയിരുന്നില്ല. പൊതുവഴിയോട് ചേര്‍ന്നാണ് മതില്‍ നിര്‍മിച്ചതെന്നതും അപകടസാധ്യത വര്‍ധിപ്പിക്കുന്നു.
 നാട്ടുകാര്‍ അധികൃതരെ സമീപിച്ചെങ്കിലും യാതൊരു നടപടിയും കൈക്കൊണ്ടിട്ടില്ല. തകര്‍ന്ന മതില്‍ പഞ്ചായത്ത് പ്രസിഡന്റ് പി.ജെ മാത്യു ഉള്‍പ്പെടെയുള്ളവര്‍ സന്ദര്‍ശിച്ചു. മതില്‍ പുനര്‍നിര്‍മിക്കാനുള്ള നടപടികള്‍ ഉടന്‍ കൈക്കൊള്ളുമെന്ന് അദ്ദേഹം പറഞ്ഞു.