കൊണ്ടോട്ടി: യു.ഡി.എഫ് സര്‍ക്കാര്‍ നടപ്പിലാക്കിയ പങ്കാളിത്ത പെന്‍ഷന്‍ പദ്ധതിക്കെതിരേ വ്യാപക പ്രതിഷോധവും പിന്നീട് അധികാരത്തിലെത്തിയപ്പോള്‍ പുനപ്പരിശോധനാ സമിതിയേയും നിയോഗിച്ച ഇടത് സര്‍ക്കാര്‍, പങ്കാളിത്തപെന്‍ഷനില്‍ ചേരാത്ത ജീവനക്കാരുടെ ശമ്പളം തടയാന്‍ വകുപ്പ് മേധാവികള്‍ക്ക് അന്ത്യശാസനം നല്‍കി.
നേരത്തെ സൂപ്പര്‍ ന്യൂമററി തസ്തികയില്‍ നിയമിതരാവുകയും പങ്കാളിത്ത പെന്‍ഷന്‍ നിലവില്‍ വന്ന 2013 ഏപ്രില്‍ ഒന്നിനുശേഷം സ്ഥിരപ്പെടുകയും ചെയ്ത ജീവനക്കാരില്‍ പങ്കാളിത്ത പെന്‍ഷനില്‍ ചേരാത്തവര്‍ക്കെതിരേയാണ് ധനകാര്യ വകുപ്പ് നടപടിക്കൊരുങ്ങുന്നത്.
പങ്കാളിത്ത പെന്‍ഷനില്‍ ചോരാത്തവര്‍ക്ക് ഈ മാസം 20 വരെ പദ്ധതിയില്‍ ചേരാന്‍ സമയം അനുവദിച്ചിട്ടുണ്ട്.ഇതിനകം ചേര്‍ന്നില്ലെങ്കില്‍ ആ മാസം മുതലുള്ള ശമ്പളബില്ലുകള്‍ പാസാക്കി നല്‍കേണ്ടതില്ലെന്നാണ് ധനവകുപ്പിന്റെ ഉത്തരവ്. പങ്കാളിത്ത പെന്‍ഷനുമുമ്പ് അവധി ഒഴിവുകളില്‍ പ്രവേശിക്കുകയും പദ്ധതി നടപ്പിലാക്കിയ ശേഷം സ്ഥിരനിയമനം ലഭിക്കുകയും ചെയ്ത അധ്യാപകര്‍ക്കും ഇത് ബാധകമാവും.പങ്കാളിത്ത പെന്‍ഷനില്‍ അംഗങ്ങളാവുന്ന ജീവനക്കാര്‍ക്ക് കുടിശ്ശിക അടക്കാന്‍ പരമാവധി 60 തുല്ല്യ തവണകള്‍ നല്‍കാനും തീരുമാനിച്ചിട്ടുണ്ട്.
യു.ഡി.എഫ് സര്‍ക്കാരിന്റെ കാലത്താണ് 2013 ഏപ്രില്‍ ഒന്നിനോ അതിനുശേഷമോ സര്‍വിസില്‍ പ്രവേശിക്കുന്ന മുഴുവന്‍ ജീവനക്കാര്‍ക്കും പങ്കാളിത്ത പെന്‍ഷന്‍ ബാധകമാക്കിയത്.സര്‍ക്കാരിന്റെ ഭീമമായ പെന്‍ഷന്‍ ബാധ്യത കുറയ്ക്കുന്നതിനാണ് കേന്ദ്രസര്‍ക്കാറിന്റെ മാതൃകയില്‍ പങ്കാളിത്ത പെന്‍ഷന്‍ നടപ്പിലാക്കിയത്.എന്നാല്‍ ഇതിനെതിരേ ഏറ്റവും അധികം സമരം നടത്തിയത് ഇടത സംഘടനകളും എല്‍.ഡി.എഫുമായിരുന്നു.
പങ്കാളിത്ത പെന്‍ഷന്‍ പുനപ്പരിശോധിക്കാനായി കഴിഞ്ഞ വര്‍ഷം റിട്ട.ജഡ്ജി എസ്.സതീഷ് ചന്ദ്രബാബുവിന്റെ നേതൃത്വത്തില്‍ മൂന്നംഗ സമിതിയെ ധനകാര്യവകുപ്പ് നിയമിച്ചിരുന്നു.
ഇവരുടെ റിപ്പോര്‍ട്ടുകള്‍ക്കും കാത്തുനില്‍ക്കാതെയാണ് പെന്‍ഷനില്‍ ചേരാത്തവര്‍ക്കെതിരേ മാസശമ്പളം തടയുന്നതടക്കമുളള നിലപാടുമായി സര്‍ക്കാര്‍ രംഗത്തെത്തിയത്.
അടിസ്ഥാന ശമ്പളവും ക്ഷാമബത്തയും ചേര്‍ന്ന തുകയുടെ പത്തുശതമാനം ഓരോ ജീവനക്കാരില്‍ നിന്നും അതത് മാസം സര്‍ക്കാര്‍ പിടിക്കുകയും ഈ തുകയ്ക്ക് തുല്യമായ തുക സര്‍ക്കാര്‍ വിഹിതവും കൂട്ടി ജീവനക്കാരന്‍ വിരമിക്കുമ്പോള്‍ പെന്‍ഷനായി നല്‍കുന്നതാണ് പങ്കാളിത്ത പെന്‍ഷന്‍.