തിരുവനന്തപുരം: സംയോജിത ശിശു സംരക്ഷണ പദ്ധതിയുടെ ഭാഗമായി സംസ്ഥാന സ്‌പോണ്‍സര്‍ഷിപ്പ് പരിപാടിയായ വിജ്ഞാന ദീപ്തിയ്ക്കായി 1.99 കോടി രൂപയുടെ ഭരണാനുമതി. 

ജെ.ജെ ആക്ടിന്റെ പരിധിയില്‍ വരുന്ന 18 വയസുവരെ പ്രായമുള്ള കുട്ടികള്‍ക്ക് പ്രതിമാസം 2,000 രൂപയാണ് ഈ പദ്ധതിയനുസരിച്ച് ധനസഹായം ലഭിക്കുക. ഇവരുടെ സ്ഥാപനേതര സംരക്ഷണം ഉറപ്പാക്കുന്നതിനും സാമ്പത്തിക പരാധീനത മൂലം വിദ്യാഭ്യാസം നേടാന്‍ കഴിയാത്ത കുട്ടികള്‍ക്ക് വീട്ടില്‍ താമസിച്ച് തന്നെ പഠനം ഉറപ്പാക്കുന്നതിനുമായാണ് വിജ്ഞാനദീപ്തി നടപ്പിലാക്കി വരുന്നത്. നിലവില്‍ തെരഞ്ഞെടുക്കപ്പെട്ട 828 കുട്ടികള്‍ക്കാണ് ധനസഹായം ലഭ്യമാകുക. 

സ്‌പോണ്‍സര്‍ഷിപ്പ് പദ്ധതിയ്ക്ക് അര്‍ഹരാകുന്ന കുട്ടികള്‍ക്ക് പരമാവധി മൂന്ന് വര്‍ഷം അല്ലെങ്കില്‍ 18 വയസ് പൂര്‍ത്തിയാകുന്നതുവരെയാണ് ധനസഹായം നല്‍കുന്നത്. 

കുട്ടികളുടെ സ്ഥാപനേതര സംരക്ഷണം പ്രോത്സാഹിപ്പിക്കുക, വിദ്യാഭ്യാസം തുടരുവാനുള്ള വഴിയൊരുക്കുക, ജെ.ജെ സ്ഥാപനങ്ങളില്‍ കഴിയുന്ന കുട്ടികളെ സ്വന്തം വീടുകളിലേക്ക് മാറ്റുക, ശിശു സൗഹൃദ അന്തരീക്ഷം ഒരുക്കുക എന്നീ ലക്ഷ്യങ്ങളോടെയാണ് വിജ്ഞാന ദീപ്തി ആവിഷ്‌ക്കരിച്ചിട്ടുള്ളത്.