മോസ്‌കോ: റഷ്യയില്‍ നടക്കുന്ന വനിതാ ലോക ബോക്‌സിങ് ചാംപ്യന്‍ഷിപ്പില്‍ ഇന്ത്യയുടെ മഞ്ജു റാണിക്ക് വെള്ളി മെഡല്‍. 48 കിലോഗ്രാം വിഭാഗം ഫൈനലില്‍ റഷ്യയുടെ എക്തറിന പാല്‍റ്റക്കേവയോട് 1-4 എന്ന നിലയില്‍ ഇന്ത്യന്‍ താരം പരാജയപ്പെടുകയായിരുന്നു.
എങ്കിലും അരങ്ങേറ്റത്തില്‍ തന്നെ വെള്ളി സ്വന്തമാക്കാനായതിന്റെ ആവേശത്തിലാണ് താരം. സ്വര്‍ണ പ്രതീക്ഷയുണ്ടായിരുന്ന മേരി കോം സെമിയില്‍ വീണതോടെ ഇന്ത്യയുടെ മെഡല്‍ പ്രതീക്ഷകള്‍ മുഴുവന്‍ മഞ്ജുവിലായിരുന്നു. എന്നാല്‍ പ്രതീക്ഷക്കൊത്ത് ഉയരാന്‍ താരത്തിന് കഴിഞ്ഞില്ല. ഇതാദ്യമായാണ് ഒരു ബോക്‌സര്‍ ലോക ചാംപ്യന്‍ഷിപ്പിലെ അരങ്ങേറ്റത്തില്‍ തന്നെ ഫൈനലിലെത്തുന്നത്. ഇതോടെ ലോക ചാംപ്യന്‍ഷിപ്പിലെ ഇന്ത്യന്‍ വെല്ലുവിളികള്‍ അവസാനിച്ചു.
ഇത്തവണ ഒരു വെള്ളിയും മൂന്ന് വെങ്കല മെഡലുകളുമാണ് ഇന്ത്യക്ക് ലഭിച്ചത്. കഴിഞ്ഞദിവസം ഇന്ത്യന്‍ താരം യമുന ബോറോ 54 കിലോഗ്രാം വിഭാഗത്തില്‍ സെമിയില്‍ തോല്‍വി വഴങ്ങിയിരുന്നു.
ചൈനീസ് തായ്‌പേയിയുടെ ഹുയാങ് ഹസിയാവോ വെന്‍ ആണ് ജമുനയെ തോല്‍പ്പിച്ചത്. 69 കിലോഗ്രാം വിഭാഗത്തില്‍ ലവ്‌ലിന ബോര്‍ഗോഹെയനും ഇന്ത്യയ്ക്കുവേണ്ട@ി വെങ്കലം സ്വന്തമാക്കി. തായ്‌ലന്‍ഡിന്റെ ചുതാമത് രക്‌സതിനെ 4-1 സ്‌കോറില്‍ വീഴ്ത്തിയായിരുന്നു മഞ്ജു ഫൈനലില്‍ പ്രവേശിച്ചത്.