വൈക്കം: കൂടത്തായി കൊലപാതക കേസിലെ പരാതിക്കാരനും ജോളിയുടെ ആദ്യഭര്‍ത്താവ് കൊല്ലപ്പെട്ട റോയി തോമസിന്റ സഹോദരനുമായ റോജോ തോമസ് വൈക്കത്തെ സഹോദരിയുടെ വീട്ടിലെത്തി. അന്വേഷണ സംഘത്തിനു മുന്‍പാകെ മൊഴി നല്‍കാനായാണ് അമേരിക്കയില്‍ നിന്ന് വൈക്കത്തിനടുത്തുള്ള കുലശേഖര മംഗലത്തെ സഹോദരി രഞ്ജിയുടെ വീട്ടില്‍ എത്തിയത്. ഇന്നലെ പുലര്‍ച്ചെ 4.50ന് നെടുമ്പാശേരി വിമാനത്താവളത്തില്‍ വന്നിറങ്ങിയ റോജോ കനത്ത പൊലിസ് സുരക്ഷയിലാണ് സഹോദരി രഞ്ജി വാടകയ്ക്കു താമസിക്കുന്ന വൈക്കം കുലശേഖരമംഗലം ടോളിലെ വീട്ടിലേക്ക് വന്നത്.
റോജോയുടെ മൊഴിയെടുക്കാന്‍ പൊലിസ് എത്തിയേക്കുമെന്ന അഭ്യൂഹത്തെ തുടര്‍ന്ന് ഇന്നലെ പുലര്‍ച്ചെ മുതല്‍ ടോള്‍ ജങ്ഷനുസമീപം മാധ്യമങ്ങള്‍ തമ്പടിച്ചിരുന്നു. റോജോയുടെ സൗകര്യാര്‍ഥം അന്വേഷണ സംഘം മൊഴിയെടുക്കാന്‍ കോഴിക്കോട്ട് സൗകര്യമൊരുക്കാനും സാധ്യതയുണ്ടെന്ന് പൊലിസ് പറഞ്ഞു. 2013 മുതല്‍ വൈക്കം കുലശേഖരമംഗലം ടോളിലെ വാടക വീട്ടിലാണ് റോജോയുടെ സഹോദരി രഞ്ജി താമസിക്കുന്നത്.