ധാക്ക: ബംഗ്ലാദേശില്‍ രണ്ടു ദിവസത്തിനിടെ ഇടിമിന്നലേറ്റ് 22 പേര്‍ മരിച്ചു. ഞായറാഴ്ച രാജ്യത്ത് ആഞ്ഞുവീശിയ വന്‍ കൊടുങ്കാറ്റിനെ തുടര്‍ന്നുണ്ടായ ശക്തമായ മിന്നലിലാണ് ഇത്രയുംപേര്‍ മരിച്ചത്. കാലവര്‍ഷം ആരംഭിച്ചതോടെ പല ബംഗ്ലാദേശ് ഗ്രാമങ്ങളും വെള്ളത്തിനടിയിലായിരിക്കുകയാണ്.
കപ്പലണ്ടിപ്പാടത്ത് പണിയെടുക്കുകയായിരുന്ന ദമ്പതിമാരും മകളും മരിച്ചവരുടെ കൂട്ടത്തില്‍പ്പെടും. കേന്ദ്ര ദുരന്ത നിവാരണ വിഭാഗത്തിന്റെ നേതൃത്വത്തില്‍ രക്ഷാപ്രവര്‍ത്തനങ്ങള്‍ പുരോഗമിച്ചുവരുന്നതായി മേധാവി റഈസ് അഹ്മദ് അറിയിച്ചു. കഴിഞ്ഞയാഴ്ച പ്രളയത്തെ തുടര്‍ന്ന് 160 പേര്‍ ബംഗ്ലാദേശില്‍ മരിച്ചിരുന്നു.