കൊടുങ്ങല്ലൂര്‍: ശ്രീനാരായണപുരം ശാന്തിപുരത്ത് കാറും ബൈക്കും കൂട്ടിയിടിച്ച് ബൈക്ക് യാത്രക്കാരായ മതിലകം ബ്ലോക്ക് പഞ്ചായത്ത് അംഗത്തിനും ഭര്‍ത്താവിനും ഗുരുതരമായ പരുക്കേറ്റു. ബ്ലോക്ക് പഞ്ചായത്ത് അഴീക്കോട് ഡിവിഷന്‍ അംഗം സീന അഷറഫ് (48), ഭര്‍ത്താവ് സി.പി.എം. അഴീക്കോട് ലോക്കല്‍ കമ്മിറ്റി അംഗവും കടലോര ജാഗ്രതാ സമിതി ചെയര്‍മാനുമായ പൂവ്വത്തിങ്കല്‍ അഷറഫ് (55) എന്നിവര്‍ക്കാണ് പരുക്കേറ്റത്.
ഇവരെ ആദ്യം ടി.കെ.എസ്.പുരം മെഡികെയര്‍ ആസ്പത്രിയിലും ഇവിടെ നിന്നും വിദഗ്ധ ചികിത്സക്കായി എറണാകുളം മെഡിക്കല്‍ ട്രസ്റ്റ് ആസ്പത്രിയിലും പ്രവേശിപ്പിച്ചു. കാറിലുണ്ടായിരുന്ന മാവേലിക്കര കല്ലിന്‍മേല്‍ വാഴപ്പിള്ളി മുരളീധരക്കുറുപ്പിന്റെ ഭാര്യ ലൈല (64) നെ നിസാര പരുക്കുകളോടെ മോഡേണ്‍ ആസ്പത്രിയില്‍ പ്രവേശിപ്പിച്ചു.
ഇവരുടെ ഭര്‍ത്താവും മകനും പരുക്കേല്‍ക്കാതെ രക്ഷപ്പെട്ടു. ബുധനാഴ്ച ഉച്ചകഴിഞ്ഞ് മൂന്നര മണിയോടെ ശ്രീനാരായണപുരം ശാന്തിപുരത്തു വെച്ചാണ് അപകടം. ഗുരുവായൂര്‍ ക്ഷേത്രദര്‍ശനത്തിന് പോവുകയായിരുന്നവര്‍ സഞ്ചരിച്ച കാര്‍ നിയന്ത്രണം വിട്ട് എതിര്‍ വശത്തു നിന്നും വന്നിരുന്ന ബൈക്ക് യാത്രക്കാരായ ദമ്പതികളെ ഇടിച്ച് തെറിപ്പിച്ച് എതിര്‍വശത്തെ പത്തടിയോളം താഴ്ചയുള്ള ഗര്‍ത്തത്തിലേക്ക് പതിക്കുകയായിരുന്നു.