ജെയ്പൂര്‍: രാജസ്ഥാനില്‍ ഭരണകക്ഷിയായ ബി.ജെ.പിയില്‍ സീറ്റ് നിഷേധിക്കപ്പെട്ടവര്‍ ഉയര്‍ത്തുന്ന കലാപം പാര്‍ട്ടി നേതൃത്വത്തെ പ്രതിസന്ധിയിലാക്കുന്നു. കഴിഞ്ഞ ദിവസം മന്ത്രിയായ സുരേന്ദ്ര ഗോയല്‍ രാജിവച്ചതിനു പിന്നാലെ ഇന്നലെ അഞ്ചുതവണ എം.എല്‍.എയായ ഹബീബ് റഹ്്മാനും പാര്‍ട്ടിയില്‍നിന്ന് രാജിവച്ചത് നേതൃത്വത്തിനു വലിയ തിരിച്ചടിയായി.
തെരഞ്ഞെടുപ്പില്‍ 131 സ്ഥാനാര്‍ഥികളുടെ ലിസ്റ്റ് പുറത്തുവിട്ടപ്പോള്‍ അതില്‍ ഹബീബ് റഹ്്മാന്റെ പേര് ഇല്ലാത്തിനെ തുടര്‍ന്നാണ് അദ്ദേഹം പാര്‍ട്ടിയില്‍നിന്ന് രാജിവച്ചത്. ഹബീബ് പ്രതിനിധാനം ചെയ്തിരുന്ന മണ്ഡലത്തില്‍ മോഹന്‍ റാം ചൗധരിയെ പകരം നിശ്ചയിച്ചിട്ടുണ്ട്. ദിദ്‌വാന മണ്ഡലത്തില്‍ സീറ്റ് പ്രതീക്ഷിച്ചിരുന്ന മുഖ്യമന്ത്രി വസുന്ധര രാജെയുടെ അടുത്ത അനുയായി യൂനുസ് ഖാനും ഇപ്പോള്‍ പുറത്തുവിട്ട പട്ടികയില്‍ ഇടംപിടിച്ചിട്ടില്ല.
മുസ്‌ലിംകള്‍ക്ക് ബി.ജെ.പിയില്‍ നിന്നാല്‍ ഒരുതരത്തിലുള്ള അംഗീകാരവും ലഭിക്കില്ലെന്ന് മനസിലാക്കിയാണ് താന്‍ രാജിവയ്ക്കുന്നതെന്ന് ഹബീബ് റഹ്്മാന്‍ പറഞ്ഞു. താന്‍ പാര്‍ട്ടിക്കെതിരായി ഒന്നും ചെയ്തിട്ടില്ല. എന്നിട്ടും സീറ്റ് നിഷേധിച്ചത് മുസ്്‌ലിമായതു കൊണ്ടാണെന്നാണെന്നും അദ്ദേഹം ആരോപിച്ചു. പ്രവര്‍ത്തകരുമായി കൂടിയാലോചിച്ച ശേഷം ഭാവി പരിപാടി പ്രഖ്യാപിക്കുമെന്ന് അദ്ദേഹം പറഞ്ഞു.