പുതുക്കാട്: സമയക്രമത്തെ ചൊല്ലിയുള്ള തര്‍ക്കത്തെ തുടര്‍ന്ന് കല്ലൂര്‍ ആലേങ്ങാടില്‍ കെ.എസ്.ആര്‍.ടി.സി ബസിലിടിച്ച സ്വകാര്യബസ് നാട്ടുകാര്‍ തടഞ്ഞു. ഇന്നലെ വൈകിട്ട് ആറരയോടെയായിരുന്നു സംഭവം.  തൃശൂരില്‍ നിന്ന് മരോട്ടിച്ചാല്‍ ഭാഗത്തേക്ക് പോയിരുന്ന കെ.എസ്.ആര്‍.ടി.സി ബസിന്റെ ഡ്രൈവറുടെ സമീപത്തുള്ള കണ്ണാടി അപകടത്തില്‍ തകര്‍ന്നു.  ഇതേ റൂട്ടില്‍ കല്ലൂര്‍ വരെ സര്‍വിസ് നടത്തുന്ന മാത ബസാണ് അപകടത്തിനിടയാക്കിയത്. തൃശൂരില്‍ നിന്നു നിറയെ യാത്രക്കാരുമായി വന്നിരുന്ന കെ.എസ്.ആര്‍.ടി.സി ബസിനെ പല സ്ഥലങ്ങളിലും വെച്ചു സ്വകാര്യ ബസ് ഇടിക്കാന്‍ ശ്രമിച്ചതായി യാത്രക്കാര്‍ പറഞ്ഞു. ആലേങ്ങാട് സെന്ററില്‍ സര്‍വിസ് നിര്‍ത്തേണ്ട സ്വകാര്യ ബസ് കുറച്ചു ദൂരംകൂടി പിന്‍തുടര്‍ന്നെത്തിയാണ് കെ.എസ്.ആര്‍.ടി.സി ബസിലിടിച്ചത്. ക്ഷുഭിതരായ യാത്രക്കാരും നാട്ടുകാരും ചേര്‍ന്ന് സ്വകാര്യ ബസ് തടഞ്ഞിടുകയായിരുന്നു. പിന്നീട് പുതുക്കാട് പൊലിസ് സ്ഥലത്തെത്തി സ്വകാര്യ ബസ് കസ്റ്റഡിയിലെടുത്തു. അപകടകരമായ രീതിയില്‍ ബസ് ഓടിച്ച ഡ്രൈവര്‍ക്കെതിരേ പൊലിസ് കേസെടുത്തു.