റിയാദ്: ഇക്കഴിഞ്ഞ പതിനാലിന് ആഗോള എണ്ണ വ്യവസായത്തെ പിടിച്ചുലച്ച അരാംകോ എണ്ണ കമ്പനികൾക്ക് നേരെയുണ്ടായ ആക്രമണത്തെ തുടർന്ന് ഞൊടിയിലയിൽ മുന്നൂറിലധികം എണ്ണ കിണറുകളാണ് അടച്ചു പൂട്ടിയതെന്ന് റിപ്പോർട്ട്. സഊദി അറാംകൊ കമ്പനിക്കു കീഴിലെ ഖുറൈസ് എണ്ണപ്പാടത്തെ പ്രൊഡക്ഷൻ ഡിപ്പാർട്ട്‌മെന്റ് മാനേജർ മുഹമ്മദ് അൽസുവൈഗ് ആണ് ഇക്കാര്യം വെളിപ്പെടുത്തിയത്. റിമോട്ട് കൺട്രോൾ സംവിധാനം ഉപയോഗിച്ച് നടത്തിയ ഈ നീക്കമാണ് കൂടുതൽ അപകടങ്ങളിലേക്ക് നീങ്ങാതെ രക്ഷപ്പെടുത്തിയത്. 

       പ്രവിശാലമായ പ്രദേശത്ത് വ്യാപിച്ചുകിടക്കുന്ന എണ്ണപ്പാടങ്ങളും എണ്ണക്കിണറുകളും റിമോട്ട് കൺട്രോൾ രീതിയിൽ പ്രവർത്തിക്കുന്ന സ്മാർട്ട് ഓയിൽഫീൽഡ് സംവിധാനം വഴിയാണ് പ്രവർത്തിപ്പിക്കുന്നത്. ഖുറൈസിലെ അഞ്ചു എണ്ണ യൂനി റ്റുകൾ സ്വതന്ത്രമായാണ് പ്രവർത്തിക്കുന്നത്. ഉൽപാദനം വേഗം പുനരാരംഭിക്കുന്നതിന് ഇത് സഹായിച്ചു.

ആക്രമണം നടന്ന് 24 മണിക്കൂറിനകം ഉൽപാദന നിലവാരം നിലനിർത്തുന്നതിന് കമ്പനിയെ സഹായിച്ച പ്രധാന ഘടകമാണിതെന്നും മുഹമ്മദ് അൽസുവൈഗ് പറഞ്ഞു.