കാസര്‍കോട്: യു.പിയില്‍ എ.ടി.എം തട്ടിപ്പു നടത്തി പണം കൊള്ളയടിച്ച പ്രതികളില്‍ രണ്ടുപേര്‍ യു.പി പൊലിസിന്റെ കസ്റ്റഡിയില്‍ നിന്നും രക്ഷപ്പെട്ടു. കളനാട് വില്ലേജ് പരിധിയിലെ അബ്ദുര്‍ റഹ്മാന്‍ ജംഷീദ്, അബ്ദുര്‍ റൈഫാദ് എന്നിവരാണ് പൊലിസിനെ വെട്ടിച്ച് രക്ഷപ്പെട്ടത്. കഴിഞ്ഞ ദിവസം രാത്രി രാത്രി 11ഓടെയാണ് ഉത്തര്‍പ്രദേശ് പുത്തുവാലി സി.ഐ എസ്.സി പാണ്ട്യ, എസ്.ഐ അനില്‍ യാദവ്, മൂന്ന് കോണ്‍സ്റ്റബിള്‍മാര്‍ എന്നിവര്‍ ചേര്‍ന്ന് പ്രതികളെ കാസര്‍കോട്ടെത്തിച്ചത്.

തുടര്‍ന്ന് രാത്രി 12ഓടെ ഇവര്‍ കാസര്‍കോട്ടെ ലോഡ്ജില്‍ മുറിയെടുത്തു താമസിച്ചു. ഇവിടെ നിന്നുമാണ് സംഘം പൊലിസിനെ വെട്ടിച്ച് അതിവിദഗ്ദ്ധമായി കടന്നുകളഞ്ഞത്. ഇവരുടെ കൈയ്യില്‍ വിലങ്ങുണ്ടായിരുന്നു. ഇതുമായാണ് പ്രതികള്‍ രക്ഷപ്പെട്ടത്. ഇവരെ കണ്ടെത്താനായി യു.പി പൊലിസ് കാസര്‍കോട് ടൗണ്‍ പൊലിസിന്റെ സഹായം തേടിയിട്ടുണ്ട്.

അതേസമയം പ്രതികളെ തെളിവെടുപ്പിനായെത്തിക്കുന്ന വിവരം തങ്ങളെ അറിയിച്ചിട്ടില്ലെന്നും പ്രതികളെ ലോഡ്ജില്‍ പാര്‍പ്പിക്കേണ്ട ആവശ്യമുണ്ടായിരുന്നില്ലെന്നും കാസര്‍കോട് പൊലിസ് പറഞ്ഞു. യു.പി പൊലിസിന്റെ കെടുകാര്യസ്ഥതയാണ് പ്രതികള്‍ രക്ഷപ്പെടാന്‍ കാരണമായതെന്ന ആരോപണവും ഉയര്‍ന്നിട്ടുണ്ട്.

ഒരാഴ്ച മുമ്പാണ് എ.ടി.എം തട്ടിപ്പുമായി ബന്ധപ്പെട്ട് കാസര്‍കോട് സ്വദേശികളായ അഞ്ചംഗ സംഘത്തെ യു.പിയില്‍ പൊലിസ് അറസ്റ്റു ചെയ്തത്. മീപ്പുഗിരി ആര്‍.ഡി നഗറിലെ മുഹമ്മദ് ബിലാല്‍, കുഡ്ലുവിലെ മുഹമ്മദ് സുഹൈല്‍, കളനാട് വില്ലേജ് പരിധിയിലെ യാസിന്‍ എന്നിവരാണ് മറ്റുപ്രതികള്‍. സംഘം സഞ്ചരിക്കുകയായിരുന്ന കെ.എല്‍ 14 വി 1037 നമ്പര്‍ ആള്‍ട്ടോ കാറും പൊലിസ് കസ്റ്റഡിയിലെടുത്തിരുന്നു. എ.ടി.എം കേന്ദ്രങ്ങളില്‍ രഹസ്യ ക്യാമറ സ്ഥാപിച്ചു ഉപഭോക്താക്കളുടെ രഹസ്യ നമ്പര്‍ ശേഖരിക്കുകയും തുടര്‍ന്ന് വ്യാജ കാര്‍ഡുകള്‍ നിര്‍മിച്ചു കൈക്കലാക്കിയ രഹസ്യ നമ്പറുകള്‍ ഉപയോഗിച്ച് ലക്ഷങ്ങള്‍ തട്ടിയെടുത്ത സംഭവത്തിലാണ് പ്രതികള്‍ പിടിയിലായത്.