മഞ്ചേശ്വരം: ഉപതെരഞ്ഞെടുപ്പ് നടക്കുന്ന മഞ്ചേശ്വരം മണ്ഡലത്തില്‍ കനത്ത പോളിങാണ് രേഖപ്പെടുത്തുന്നത്. ഉച്ചവരെ 46.03 ശതമാനം പേര്‍ വോട്ടു രേഖപ്പെടുത്തി.

അതേസമയം, ബി.ജെ.പി കേന്ദ്രങ്ങളില്‍ ശക്തമായ പോളിങാണ് ഉച്ചവരെ രേഖപ്പെടുത്തിയത്. പലയിടത്തും ഉച്ചയോടെ പോളിങ് 50 ശതമാനം കടന്നു.

ബി.ജെ.പിക്ക് മേല്‍ക്കൈയുള്ള മംഗല്‍പാടി, കാളിയൂര്‍, ഇച്ചിലമ്പാടി തുടങ്ങി ബൂത്തുകളില്‍ 50 ശതമാനത്തിനടുത്ത് വോട്ടിങ് രേഖപ്പെടുത്തി.

ഉച്ചവരെ ഏറ്റവും കൂടുതല്‍ പോളിങ് രേഖപ്പെടുത്തിയ ആറു ബൂത്തുകളില്‍ മൂന്നെണ്ണം ബി.ജെ.പിക്ക് മേല്‍ക്കൈയുള്ളതാണ്.

അതേസമയം, മുസ്‌ലിം ലീഗിന്റെ ശക്തികേന്ദ്രങ്ങളില്‍ പോളിങ് മന്ദഗതിയിലുമാണ്. 2016 ലെ നിയമസഭാ തെരഞ്ഞെടുപ്പില്‍ മുസ് ലിം ലീഗിന് ഏറ്റവും കൂടുതല്‍ വോട്ടു ലഭിച്ച മംഗല്‍പാടി സൗത്തില്‍ 40.97 ശതമാനം വോട്ടു മാത്രമാണ് ഉച്ചവരെ രേഖപ്പെടുത്തിയത്.

സി.പി.എമ്മിന് മേല്‍ക്കൈയുള്ള ബൂത്തുകളിലും കനത്ത പോളിങാണ് രേഖപ്പെടുത്തുന്നത്. 2016 ല്‍ സി.പി.എമ്മിന് മേല്‍ക്കൈ ഉണ്ടായിരുന്ന എം.ജി.എല്‍.സി കെടുമ്പടായി ബൂത്തില്‍ 49.02 ശതമാനം വോട്ടുകള്‍ ഒരു മണിയോടെ രേഖപ്പെടുത്തിക്കഴിഞ്ഞു.