മലപ്പുറം: താനൂരില്‍ നിന്ന് നവംബര്‍ 16ന് മത്സ്യ ബന്ധനത്തിന് പോയി കടലില്‍ അകപ്പെട്ട മത്സ്യത്തൊഴിലാളികളെ രക്ഷപ്പെടുത്തി. താനൂര്‍ സ്വദേശി കളായ റാഫി, കബീര്‍ എന്നിവരെയാണ് പൊന്നാനി ഫിഷറീസിന്റെ റസ്‌ക്യൂ ബോട്ടില്‍ പോയി വള്ളത്തിന്റെ എഞ്ചിന്‍ ശരിയാക്കി തിരിച്ചെത്തിച്ചത്.
'മാഷാ അള്ളാ ' എന്ന ഇവരുടെ ചെറിയ വള്ളം എഞ്ചിന്‍ കേടായി കടലില്‍ അകപ്പെടുകയായിരുന്നു. തുടര്‍ന്ന് ഇന്നലെ കൂടെയുണ്ടായിരുന്ന മറ്റു മത്സ്യത്തൊഴിലാളികളാണ് കരയിലെത്തി ഫിഷറീസ് ഉദ്യോഗസ്ഥരെ അറിയിച്ചത്.
ഫിഷറീസ് ഡെപ്യൂട്ടി ഡയറക്ടറുടെ നിര്‍ദേശത്തെ തുടര്‍ന്ന് റസ്‌ക്യൂ ഗാര്‍ഡ് ജാഫര്‍, ഫീഷറീസ് സ്റ്റാഫ് ഷിബു, ബോട്ട് ജീവനക്കാര്‍ തുടങ്ങിയവര്‍ റസ്‌ക്യൂ ബോട്ടില്‍ പോയി ഇവരുടെ വള്ളത്തിന്റെ എഞ്ചിന്‍ ശരിയാക്കി തിരിച്ചെത്തിക്കുകയായിരുന്നു. ഏകദേശം പൊന്നാനി ഭാഗത്ത് നിന്ന് 20 കാതം അകലെയാണ് ഇവര്‍ അകപ്പെട്ടത്.