പോര്‍ട്ട് മോറസ്ബി: യു.എസ്-ചൈന വ്യാപാര തര്‍ക്കത്തെ തുടര്‍ന്ന് അപെക് (ഏഷ്യാ-പസഫിക് ഇക്കണോമിക് കോര്‍പറേഷന്‍) ഉച്ചകോടി യോജിപ്പിലെത്താതെ സമാപിച്ചു. പരസ്പര തര്‍ക്കത്തില്‍ യോജിപ്പിലെത്താന്‍ രണ്ടു വന്‍രാജ്യങ്ങള്‍ തയാറായില്ലെന്നു പപ്പുവ ന്യൂഗിനിയ പ്രധാനമന്ത്രി പീറ്റര്‍ ഒ നൈല്‍ പറഞ്ഞു. 2020ഓടെ അപെക് രാജ്യങ്ങളില്‍ സ്വതന്ത്രവും തുറന്നതുമായ വ്യാപാരം ഉറപ്പാക്കാന്‍ ശ്രമിക്കുമെന്ന് അദ്ദേഹം പറഞ്ഞു.
വ്യാപാരവുമായി ബന്ധപ്പെട്ടുള്ള നിലപാടുകളിലാണ് ചൈനയും യു.എസും ഏറ്റുമുട്ടിയത്. 'അമേരിക്ക ഫസ്റ്റ് 'വ്യാപാര സംരക്ഷണ വാദത്തെ വിമര്‍ശിച്ച ചൈനീസ് പ്രസിഡന്റ് ഷി ജിന്‍പിങ്, സ്വതന്ത്ര വ്യാപാര നയങ്ങള്‍ പിന്തുടരാന്‍ ലോകരാജ്യങ്ങളോട് ആവശ്യപ്പെട്ടിരുന്നു. ഒരാള്‍ സ്വന്തം വാതിലുകള്‍ അടക്കുകയാണെങ്കില്‍ അവരാണ് ലോകത്തുനിന്നു ബന്ധം വേര്‍പ്പെട്ടവരാകുകയെന്നും അദ്ദേഹം പറഞ്ഞിരുന്നു. ഇതിനെ എതിര്‍ത്ത് അമേരിക്കന്‍ വൈസ് പ്രസിഡന്റ് മൈക് പെന്‍സും രംഗത്തെത്തിയിരുന്നു.