റിയാദ്: ഇന്ത്യയിലെ റിലയൻസ് ഇൻഡസ്ട്രീസിനു കീഴിലെ റിഫൈനറി, പെട്രോകെമിക്കൽസ് മേഖലയുടെ  ഓഹരികൾ വാങ്ങുന്നത് സംബന്ധിച്ച് നടപടികൾ 2021 ഓടെ പൂർത്തിയാകുമെന്ന് സഊദി അരാംകോ. ലോകത്തെ ഏറ്റവും വലിയ എണ്ണയുൽപാദക കമ്പനികളിലൊന്നായ സഊദി അരാംകോ സീനിയർ വൈസ് പ്രസിഡന്റ് അബ്ദുൽ അസീസ് അൽഖുദൈമിയാണ് ഇക്കാര്യം അറിയിച്ചത്. ഇന്ത്യൻ എണ്ണകമ്പനികളിലെ പ്രധാന കമ്പനിയായ റിയലൻസുമായുള്ള സഊദി അരാംകോ ഇടപാട് സാമ്പത്തിക രംഗത്ത് ഏറെ മാറ്റങ്ങൾ ഉണ്ടാക്കുമെന്നാണ് കരുതുന്നത്. ഇടപാട് പൂർത്തിയാകുന്നതോടെ സഊദി അരാംകോ എണ്ണ സംസ്‌കരണ ശേഷി പ്രതിദിനം എണ്പത്തൻ ലക്ഷം ബാരലായി ഉയരുമെന്നും ഇന്ത്യയും ചൈനയും പോലെ എണ്ണയാവശ്യത്തിൽ അതിവേഗ വളർച്ചയുള്ള വിപണികളിൽ നിർമാണം പൂർത്തിയാവുകയോ നിർമാണ ഘട്ടത്തിലുള്ളതോ ആയ റിഫൈനറി, പെട്രോകെമിക്കൽസ് പദ്ധതികളിൽ നിക്ഷേപം നടത്തുന്നതിനാണ് സഊദി ആഗ്രഹിക്കുന്നതെന്നും അൽഖുദൈമി പറഞ്ഞു.
      റിലയൻസ് ഇൻഡസ്ട്രീസിനു കീഴിലെ റിഫൈനറി, പെട്രോകെമിക്കൽസ് മേഖലയുടെ 20 ശതമാനം ഓഹരികൾ സഊദി അരാംകോ വാങ്ങുന്നതായി നേരത്തെ തന്നെ വാർത്തകളുണ്ടായിരുന്നു. ഏകദേശം 15 ബില്യൺ ഡോളർ വരുന്ന റിലയൻസ് പെട്രോ കെമിക്കൽസിന്റെ 20 ശതമാനം ഓഹരികൾ വാങ്ങുമെന്നായിരുന്നു വാർത്തകളെങ്കിലും ഇക്കാര്യത്തിൽ  തീരുമാനമായിരുന്നില്ല. എന്നാൽ, ഏറ്റവും ഒടുവിലെ റിപ്പോർട്ടുകൾ പ്രകാരം 20 ശതമാനം ഓഹരികൾ സഊദി അറാംകൊക്ക് വിൽക്കുന്നതിന് ആഗ്രഹിക്കുന്നതായി റിലയൻസ് അറിയിച്ചിട്ടുണ്ട്. 7,500 കോടി ഡോളറിന്റെ ഇടപാട് ഇന്ത്യൻ ചരിത്രത്തിലെ ഏറ്റവും വലിയ ഇടപാടായിരിക്കും. ഈ വർഷം ആദ്യ പകുതിയിൽ 4,690 കോടി ഡോളർ അറ്റാദായം നേടിയ സൗദി അറാംകൊ ലോകത്തിലെ ഏറ്റവും കൂടുതൽ ലാഭമുണ്ടാകുന്ന കമ്പനിയാണെന്ന് തെളിയിച്ചിരുന്നു