മഞ്ചേരി: നഗരത്തില്‍വച്ച് ബൈക്ക് യാത്രികനില്‍നിന്ന് ഏഴ് കിലോ കഞ്ചാവ് പിടികൂടി. മഞ്ചേരി തുറക്കല്‍ സ്വദേശി പുതുശേരി വീട്ടില്‍ സൈനുദ്ദീ(31)നെയാണ് എക്‌സൈസ് പിടികൂടിയത്. വലിയ തോള്‍ സഞ്ചിയിലാക്കിയാണ് കഞ്ചാവ് കടത്താന്‍ ശ്രമിച്ചത്. ഇയാളില്‍ നിന്ന് 30,000 രൂപയും ബൈക്കും പിടിച്ചെടുത്തു.
രഹസ്യ വിവരത്തെ തുടര്‍ന്ന് കഴിഞ്ഞ ദിവസം റേഞ്ച് എക്‌സൈസ് നടത്തിയ പരിശോധനയില്‍ ജസീല ജങ്ഷനില്‍വച്ചാണ് സൈനുദ്ദീനെ പിടികൂടിയത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. തമിഴ്‌നാട്ടിലെ ഏര്‍വാടിയില്‍ നിന്ന് കഞ്ചാവ് എത്തിച്ചാണ് സൈനുദ്ദീന്‍ വില്‍പന നടത്തുന്നത്. നഗരത്തിലെ ബസ്സ്റ്റാന്‍ഡുകളും വിദ്യാലയങ്ങളും കേന്ദ്രീകരിച്ച് ചില്ലറ വില്‍പന നടത്തുന്ന സംഘത്തലവനെ കുറിച്ച് ഇയാളില്‍ നിന്ന് വിവരം ലഭിച്ചാതായും എക്‌സൈസ് ഉദ്യോഗസ്ഥര്‍ പറഞ്ഞു.
നഗരത്തില്‍ കഞ്ചാവ് ഉപയോഗിക്കുന്നവരെ കേന്ദ്രീകരിച്ച് എക്‌സൈസ് വിജിലന്‍സ് സംഘം നടത്തിയ അന്വേഷണത്തിലാണ് സൈനുദ്ദീനെ കുറിച്ച് വിവരം ലഭിച്ചത്.
മഞ്ചേരി റേഞ്ച് എക്‌സൈസ് ഇന്‍സ്‌പെക്ടര്‍ പി.വി രാധാകൃഷ്ണന്‍, അസിസ്റ്റന്റ് എക്‌സൈസ് ഇന്‍സ്‌പെക്ടര്‍ എം.അബ്ദുല്‍ ബഷീര്‍, പ്രിവന്റീവ് ഓഫിസര്‍ ടി.ഷിജുമോന്‍, സിവില്‍ എക്‌സൈസ് ഓഫിസര്‍മാരായ പി.സഫീറലി, എ.പി ഉമ്മര്‍കുട്ടി, ടി.ശ്രീജിത്ത്, കെ.സതീഷ്‌കുമാര്‍, ഡ്രൈവര്‍ എം.ഉണ്ണികൃഷ്ണന്‍ എന്നിവര്‍ അടങ്ങിയ സംഘമാണ് പ്രതിയെ പിടികൂടിയത്.