റായ്പൂര്‍: ഛത്തിസ്ഗഡില്‍ സുക്മയില്‍ മാവോവാദികളുമായുള്ള ഏറ്റുമുട്ടലില്‍ പ്രത്യേക ദൗത്യ സേനയിലെ അഞ്ചുജവാന്‍മാര്‍ക്ക് പരുക്കേറ്റു. ഇവരില്‍ മൂന്നുപേരുടെ നില ഗുരുതരമാണ്. ഏറ്റുമുട്ടല്‍ ഇന്നലെ ഏറെ വൈകിയും തുടരുകയാണെന്ന് പൊലിസ് അറിയിച്ചു.
ചിന്ദ്ഗുഫ പൊലിസ് സ്റ്റേഷന്‍ പരിധിയിലുള്ള വനമേഖലയിലാണ് ഏറ്റുമുട്ടല്‍. പ്രത്യേക ദൗത്യസേനക്കു പുറമെ ജില്ലാ റിസര്‍വ് ഗാര്‍ഡ്(ഡി.ആര്‍.ജി), കമാന്‍ഡോ ബറ്റാലിയന്‍ ഫോര്‍ റെസല്യൂട്ട് ആക്ഷന്‍(കോബ്രാ) എന്നീ സുരക്ഷാ സേനകളും മാവോ വാദി വേട്ടക്ക് നേതൃത്വം നല്‍കുന്നുണ്ട്. പരുക്കേറ്റ ജവാന്‍മാരെ ഉടന്‍ തന്നെ ആശുപത്രിയിലേക്ക് മാറ്റിയതായി ഡി.ഐ.ജി(ദന്തേവാഡ റേഞ്ച്) സുന്ദര്‍ രാജ് അറിയിച്ചു. കഴിഞ്ഞ ഏപ്രില്‍ 24ന് ചിന്ദ്ഗുഫയില്‍ സി.ആര്‍.പി എഫ് ക്യാംപ് ആക്രമിച്ച് 25 ജവാന്മാരെയായിരുന്നു മാവോവാദികള്‍ കൊലപ്പെടുത്തിയിരുന്നത്. തുടര്‍ന്ന് മേഖലയില്‍ ശക്തമായ സുരക്ഷ തുടരുന്നതിനിടയിലാണ് വീണ്ടും ആക്രമണം ഉണ്ടായത്.