കാബൂള്‍: നബിദിനാഘോഷത്തോടനുബന്ധിച്ച് അഫ്ഗാന്‍ തലസ്ഥാനമായ കാബൂളില്‍ നടന്ന ചടങ്ങിനിടെയുണ്ടായ ചാവേര്‍ സ്‌ഫോടനത്തില്‍ മരിച്ചവരുടെ എണ്ണം അന്‍പതായി. 80 പേര്‍ക്കു പരുക്കേറ്റു. നബിദിനത്തോടനുബന്ധിച്ചു വിവാഹഹാളില്‍ നടത്തിയ സംഗമത്തിലാണ് ചാവേര്‍ ആക്രമണമുണ്ടായതെന്നും നിരവധി പണ്ഡിതന്മാര്‍ സ്ഥലത്തുണ്ടായിരുന്നുവെന്നും ആഭ്യന്തര മന്ത്രാലയ വക്താവ് നജീബ് ഡാനിഷ് പറഞ്ഞു.
കാബൂള്‍ വിമാനത്താവളത്തിനു സമീപമുള്ള ഹാളിലേക്കെത്തിയ അക്രമി സ്വയം പൊട്ടിത്തെറിക്കുകയായിരുന്നു. ഖുര്‍ആന്‍ പാരായണം ചെയ്യുന്നതിനിടെയാണ് ആക്രമണമുണ്ടായതെന്നും നൂറു കണക്കിനു പേര്‍ പരിപാടിയിലുണ്ടായിരുന്നുവെന്നും കാബൂള്‍ പൊലിസ് വക്താവ് ബാസിര്‍ മുജാഹിദ് പറഞ്ഞു.