പാലക്കാട്: അട്ടപ്പാടി മേലേ മഞ്ചിക്കണ്ടിയില്‍ പൊലിസും മാവോയിസ്റ്റുകളും തമ്മില്‍ നടന്ന വെടിവയ്പിനു ശേഷം പ്രദേശത്ത് യുദ്ധാന്തരീക്ഷത്തിന്റെ പ്രതീതി. മലനിരകളോട് ചേര്‍ന്നുള്ള ഗ്രാമീണ റോഡുകളിലൂടെ തണ്ടര്‍ബോള്‍ട്ട് കമാന്‍ഡോകളുടെയും വിവിധ പൊലിസ് വിഭാഗങ്ങളുടെയും വാഹനങ്ങള്‍ ചീറിപ്പായുമ്പോള്‍ തങ്ങള്‍ക്ക് എന്തോ ആപത്ത് വരാന്‍ പോകുന്നുവെന്ന മട്ടിലാണ് ആദിവാസി മേഖലകളിലുള്ളവര്‍ പ്രതികരിക്കുന്നത്. മലയില്‍ മാവോയിസ്റ്റുകള്‍ക്കായുള്ള തിരച്ചില്‍ തല്‍ക്കാലം നിര്‍ത്തിയെന്ന് പറയുമ്പോഴും കേരള തണ്ടര്‍ബോള്‍ട്ടിന് പുറമെ കര്‍ണാടക, തമിഴ്‌നാട് സര്‍ക്കാരുകളുടെ വിവിധ കമാന്‍ഡോ യൂനിറ്റുകളും അട്ടപ്പാടി വനമേഖലയില്‍ മാവോയിസ്റ്റകള്‍ക്കായി തിരച്ചില്‍ തുടരുകയാണ്.
അട്ടപ്പാടിയിലേക്ക് വരുന്ന വാഹനങ്ങള്‍ കര്‍ശന പരിശോധനകള്‍ക്ക് ശേഷമാണ് യാത്ര ചെയ്യാന്‍ അനുവദിക്കുന്നത്. കൂടുതല്‍ സായുധ പൊലിസ് സേനാംഗങ്ങള്‍ പ്രദേശത്തേക്കെത്തുന്നത് ആദിവാസികളായ നാട്ടുകാരെ ഭയപ്പെടുത്തുന്നുണ്ട്. ഏറ്റുമുട്ടല്‍ ഉണ്ടാവുകയും നാലുപേര്‍ കൊല്ലപ്പെടുകയും ചെയ്തതോടെ മാവോയിസ്റ്റ് സംഘവുമായി തുടര്‍ ദിവസങ്ങളിലും പൊലിസ് ഏറ്റുമുട്ടുമെന്ന ഭയത്തിലാണ് പ്രദേശവാസികള്‍. പാലൂര്‍, മഞ്ചിക്കണ്ടി, ആനവായ്, ഭൂതാര്‍, സ്വര്‍ണഗദ്ദ മേഖലകളിലെ ഊരുകളിലുള്ളവരാണ് ഭീതിയില്‍ കഴിയുന്നത്. മാവോയിസ്റ്റ് സാന്നിധ്യം പൊലിസിന് ചോര്‍ത്തിക്കൊടുത്തത് തങ്ങളാണെന്ന ധാരണയില്‍ അവര്‍ അക്രമിക്കുമോയെന്നാണ് ആദിവാസികളുടെ ഭയം. ആദിവാസികള്‍ക്കിടയില്‍ മാവോയിസ്റ്റുകളെ സുഹൃത്തുക്കളായി കാണുന്നവരും ശത്രുക്കളായി കാണുന്നവരുമുണ്ട്. ചിലര്‍ അവര്‍ക്കാവശ്യമായ ഭക്ഷണങ്ങളും വസ്ത്രങ്ങളും സ്വകാര്യമായി എത്തിച്ചിരുന്നു. ചിലരാകട്ടെ മാവോയിസ്റ്റ് സാന്നിധ്യം അപ്പപ്പോള്‍ പൊലിസിനെ അറിയിക്കുകയും ചെയ്തിരുന്നു.
അതിനാല്‍ ആദിവാസികള്‍ക്കിടയിലും ഇക്കാര്യത്തില്‍ രണ്ടു ചേരിയാണുള്ളത്. ഇതില്‍ പൊലിസിനോട് സഹകരിക്കുന്ന വിഭാഗമാണിപ്പോള്‍ ഭയപ്പാടോടെ കഴിയുന്നത്. മറുവിഭാഗം തങ്ങളെ ഒറ്റുകൊടുക്കുമെന്നാണ് ഇവര്‍ വിചാരിക്കുന്നത്.
അതേസമയം മഞ്ചിക്കണ്ടി മലയില്‍ പൊലിസ് ഏകപക്ഷീയമായി വെടിയുതിര്‍ത്ത് മാവോയിസ്റ്റുകളെ കൊന്നതിനെതിരേ ശക്തമായ തിരിച്ചടിയുണ്ടാകുമെന്നുതന്നെയാണ് മാവോയിസ്റ്റുകളോട് അനുഭാവം പുലര്‍ത്തുന്ന ആദിവാസികള്‍ പറയുന്നത്. അത് ദിവസങ്ങള്‍ക്കുള്ളില്‍ ഉണ്ടാകുമെന്നും അവര്‍ സൂചിപ്പിക്കുന്നു. ഇക്കാര്യം രഹസ്യാന്വേഷണ ഉദ്യോഗസ്ഥര്‍ റിപ്പോര്‍ട്ട് ചെയ്തതിനെ തുടര്‍ന്ന് മഞ്ചിക്കണ്ടി മലയിലും സമീപ പ്രദേശങ്ങളിലും തണ്ടര്‍ബോള്‍ട്ട് ഉള്‍പ്പെടെ സായുധ പൊലിസ് ജാഗ്രതയോടെ നിലയുറപ്പിച്ചിരിക്കുകയാണ്.